Mumbai Rave Party: ड्रग्ज पार्टी प्रकरणी आणखी चार जणांना अटक; धक्कादायक माहिती समोर

मुंबई: नार्कोटिक्स कंट्रोल ब्युरोने क्रूझवरील ड्रग्ज पार्टी प्रकरणी आणखी चार आरोपींना अटक केली आहे. या सर्वांची कसून चौकशी करण्यात येत असून या प्रकरणात आतापर्यंत अभिनेता शाहरुख खान याचा मुलगा आर्यन खान याच्यासह एकूण १२ जणांना अटक करण्यात आली आहे. ( Mumbai Rave Party Latest Update )

वाचा: आर्यन खान, अरबाज मर्चंटला ओळखत नाही!; मूनमूनने केला ‘हा’ दावा

मुंबईजवळ समुद्रात कॉर्डेलिया या क्रूझवरील रेव्ह पार्टी एनसीबीच्या टीमने उधळली होती. शनिवारी सायंकाळी ही कारवाई करण्यात आली होती. या प्रकरणी तपासात जी माहिती समोर येत आहे ते पाहता हे प्रकरण अधिक गंभीर बनत चालले आहे. या पार्टीची लिंक आंतरराष्ट्रीय ड्रग्ज रॅकेटशी असण्याची शक्यता असून त्याबाबतचे महत्त्वाचे धागेदोरे एनसीबीच्या हाती लागले आहेत. याप्रकरणात आणखी चार जणांना अटक करण्यात आली असून त्यात ड्रग्ज तस्करही जाळ्यात आल्याने तपासाची व्याप्ती वाढली आहे.

वाचा:डार्कनेटचा वापर; ड्रग्जसाठी बिटकॉइन!; आर्यनबाबत समीर वानखेडे म्हणाले…

अब्दुल कामदार शेख (३०), श्रेयस सुरेंद्र नायर (२३), मनीष राजगारिया (३०) आणि एविऑन साहू (३०) अशी अटक करण्यात आलेल्या चौघांची नावे आहेत. यातील शेख आणि नायर या दोघांकडून २.५ ग्रॅम इक्स्टसी आणि ५४.३ ग्रॅम मेफेड्रोन एमडी जप्त करण्यात आले आहे, असे एनसीबीच्या अधिकाऱ्यांनी सांगितले. राजगारिया आणि साहू हे दोघेही पार्टीमध्ये सहभागी झाले होते. त्यांना सोमवारीच क्रूझवरून ताब्यात घेण्यात आले, असे सू्त्रांनी सांगितले. साहू याने इश्मित सिंग आणि मोहक जयस्वाल या दोघांना ड्रग्ज पुरवल्याचा संशय आहे. या सर्व आरोपींची आंतरराष्ट्रीय ड्रग्ज रॅकेटशी लिंक असल्याचे पुरावे एनसीबीच्या हाती लागले आहेत. पार्टीत ड्रग्ज पुरवण्यासाठी डार्कनेटच्या माध्यमातून संपर्क केला गेला आणि ड्रग्जसाठी बिटकॉइन देण्यात आले, असेही स्पष्ट झाले आहे. ड्रग्ज पुरवठ्याबाबत झालेले व्हॉट्सअॅप चॅटही एनसीबीला सापडले असून या प्रकरणात आणखीही काही जणांना अटक होण्याची शक्यता आहे.

वाचा: पुणे विमानतळ ‘या’ तारखेपासून १५ दिवस राहणार बंद; ‘हे’ आहे कारण

दरम्यान, ड्रग्ज पार्टी प्रकरणी अटक करण्यात आलेल्या आर्यन खान, अरबाज सेठ मर्चंट, मूनमून धामेचा, विक्रांत छोकर, इश्मित सिंग, नुपूर सारिका, गोमित चोप्रा आणि मोहक जयस्वाल या आठ जणांना ७ ऑक्टोबरपर्यंत एनसीबी कोठडी देण्यात आली असून पार्टी आणि ड्रग्ज रॅकेटमधील धागेदोरे शोधण्यासाठी सर्वांची कसून चौकशी करण्यात येत आहे.

वाचा: आर्यनकडे ड्रग्जचा साठा व मोठी रोकड; अ‍ॅरेस्ट रिपोर्टमध्ये काय म्हटलंय?