हायलाइट्स:
- पोलिसांना गुंगारा देणारा भूमाफिया टोळीचा म्होरक्या अटकेत
- गुन्हे शाखा युनिट एकने आवळल्या आरोपींच्या मुसक्या
- गुरूवारी न्यायालयात हजर करण्यात येणार
नाशिक : पोलिसांना साडे सात महिन्यांपासून गुंगारा देणारा भूमाफिया टोळीचा मास्टरमाईंड रम्मी राजपूत आणि त्याचा भाऊ जिम्मी राजपूत यांना अखेर गुन्हे शाखा युनिट एकने अटक केली आहे. हिमाचल प्रदेशातील जंगल परिसरातील राणीताला येथून दोघांना अटक करण्यात आली. त्यामुळे या प्रकरणात आतापर्यंत एकूण १६ जणांना अटक करण्यात आली आहे.
रमेश वाळू मंडलिक (वय ७०, रा. आनंदवली) हे शेतपिकांना पाणी देण्यासाठी गेले असताना त्यांच्यावर धारदार हत्यारांनी वार करण्यात आले होते. या हल्ल्यात मंडलिक यांचा मृत्यू झाला. त्यांचा मुलगा विशाल रमेश मंडलिक यांनी दिलेल्या फिर्यादीनुसार गंगापूर पोलिसांनी १८ फेब्रुवारी २०२१ रोजी खूनाचा गुन्हा दाखल केला होता. या प्रकरणात १४ जणांना अटक करण्यात आली.
रम्मी राजपूत याने जागेच्या वादावरून कट रचून रमेश मंडलिक यांच्यावर हल्ला घडवून आणल्याची माहिती तपासात पुढे आली. शहरात भूमाफिया टोळी सक्रीय असल्याचा उलगडाही तपासात झाला. परंतू घटना घडली तेव्हापासून रम्मी परमजितसिंग राजपूत व जिम्मी परमजितसिंग राजपूत पोलिसांना गुंगारा देत होते. एकाच ठिकाणी वास्तव्य न करता ते पंजाबमधील चंदीगढ, अमृतसर, हरियाणा, दिल्ली अशी ठिकाणे बदलत वास्तव्य करत होते.
गुन्हे शाखा युनिट एकचे निरीक्षक विजय ढमाळ यांच्या मार्गदर्शनाखाली सहायक निरीक्षक महेश कुलकर्णी, हवालदार येवाजी महाले, प्रशांत मरकड, महेश साळुंके, निलेश पवार हे पथक चार ते पाच दिवसांपासून पंजाबमध्ये तळ ठोकून होते. परंतू राजपूत हिमाचल प्रदेशात असल्याची खात्रीलायक माहिती त्यांना मिळाली. आरोपींचा शोध सुरू असताना जिम्मी राजपूत उत्तराखंडमधील रामनगर परिसरात आढळून आला. त्याच्याकडे रम्मी राजपूत कोठे आहे याबाबत विचारपूस करण्यात आली. त्यावेळी तो हिमाचल प्रदेशातील जंगल परिसरात असल्याची माहिती मिळाली.
रम्मी राजपूत याला जंगल परिसरातील राणीताला येथून ताब्यात घेण्यात आलं. दोघांनाही नाशिकमध्ये आणण्यात आलं असून गुरूवारी न्यायालयात हजर करण्यात येणार आहे.