‘मिस्टर अँड मिसेस माही’ हा सिनेमा ३१ मे रोजी ,शुक्रवारी प्रदर्शित झाला. पहिल्या दिवशी सिनेमाला प्रेक्षकांचा सकारात्मक प्रतिसाद मिळाल्याचं पाहायला मिळालं. सोशल मीडियावर देखील सिनेमाबद्दल सकारात्मक प्रतिक्रिया पाहायला मिळत आहेत. जान्हवी आणि राजकुमार यांनी मनं जिंकल्याचं प्रेक्षक म्हणत आहेत. सिनेमाचं पहिल्या दिवसाचं बॉक्स ऑफिस कलेक्शन समोर आलं आहे.
राजकुमार आणि जान्हवी यांच्या ‘मिस्टर अँड मिसेस माही’ या सिनेमानं प्रदर्शित झाल्यानंतर पहिल्याच दिवशी तब्बल सात कोटींचा गल्ला जमवला आहे. आता शनिवार आणि रविवारचा फायदा सिनेमाला होणार असून, कमाईत मोठी वाढ होण्याची शक्यता आहे.
या ऑफर्सचा झाला फायदा
प्रेक्षक, सिनेप्रेमींप्रती कृतज्ञता व्यक्त करण्यासाठी ‘मल्टिप्लेक्स असोसिएशन ऑफ इंडिया’नं ‘फिल्मी फ्रायडे’ अर्थात शुक्रवार, ३१ मे हा दिवस ‘सिनेमा लव्हर्स डे’ म्हणून साजरा करण्याची घोषणा केली होती. लोकसभा निवडणुका आणि आयपीएलमुळं अनेक निर्मात्यांनी सिनेमांचे प्रदर्शन लाबंणीवर टाकलं होतं. ३१ मे रोजी प्रेक्षकांना आकर्षित करण्यासाठी देशभरात फक्त ९९ रुपयांमध्ये कोणत्याही चित्रपटाचे तिकीट …अशी ऑफर्स होती. याच ऑफरचा फायदा ‘मिस्टर अँड मिसेस माही’ सिनेमाला झाला.
काय आहे सिनेमाची कथा?
‘मिस्टर अँड मिसेस माही’ हा एक ‘स्पोर्ट्स ड्रामा’ आहे. ‘स्पोर्ट्स ड्रामा’ असला तरी सिनेमात लव्हस्टोरी, रोमॅन्सचा तडका पाहायला मिळतो. राजकुमार राव हा सिनेमात महेंद्र उर्फ माही अगरवालची भूमिका साकारताना दिसतोय. तर त्याची पत्नी अर्थात जान्हवी कपूर ही महिमा अगरवालच्या भूमिकेत आहे. क्रिकेट हा खेळ आवडणारं कपल दुसऱ्या क्षेत्रात काम करत असतं, राजकुमार त्याच्या वडिलांच्या दुकानात काम करतो, तर जान्हवी डॉक्टर आहे. पण हाच आवडता खेळ क्रिकेट त्यांच्या आयुष्यात कसे रंग भरतो, आनंद घेऊन येतो, हे सिनेमात पाहायला मिळतं.