हायलाइट्स:
- एनसीबीने जारी केला क्रूझवरील कारवाईचा व्हिडिओ.
- मूनमून धामेचाने सॅनिटरी पॅड्समध्ये ड्रग्ज लपवले होते!
- पुरुष आरोपींनी शूजमध्ये ड्रग्ज लपवल्याचाही दावा.
मुंबई: मुंबईजवळ समुद्रात क्रूझवर छापा टाकत ड्रग्ज पार्टी उधळल्यानंतर एनसीबीचा कसून तपास सुरू असून तपासात रोज नवी माहिती पुढे येत आहे. या पार्टी प्रकरणी ज्यांना अटक करण्यात आली आहे त्यांनी ड्रग्ज नेमके कुठे लपवले होते, याबाबत धक्कादायक माहिती समोर आली असून मूनमून धामेचा हिने ड्रग्ज लपवण्यासाठी सॅनिटरी पॅड्सचा वापर केला, असा एनसीबीचा दावा आहे. ( Mumbai Drug Bust Case Updates )
वाचा: क्रूझवरून कोणाला पकडलं, कोणाला सोडलं?; NCBने ‘तो’ आरोप फेटाळला
कॉर्डेलिया क्रूझवर २ ऑक्टोबर रोजी एनसीबीच्या २२ अधिकाऱ्यांच्या पथकाने छापा टाकला होता. या कारवाईत मोठ्या प्रमाणात ड्रग्ज जप्त करण्यात आल्याचा दावा करण्यात आला होता. या कारवाईत क्रूझवरून अभिनेता शाहरुख खान याचा मुलगा आर्यन खान , त्याचा मित्र अरबाज मर्चंट आणि मूनमून धामेचा हिच्यासह ८ जणांना अटक करण्यात आली व या पार्टीशी लिंक असलेल्या आणखी ११ जणांना त्यानंतर अटक करण्यात आले आहे. याप्रकरणी एनसीबीचा कसून तपास सुरू असतानाच आता क्रूझवरील कारवाईदरम्यानचा एक व्हिडिओ एनसीबीकडून जारी करण्यात आला आहे. हा व्हिडिओ सोशल मीडियावरही व्हायरल झाला आहे. या व्हिडिओच्या आधारे धक्कादायक दावा करण्यात आला आहे.
वाचा: ‘त्या’ तिघांना सोडण्यासाठी भाजपा नेत्यांचे फोन; समीर वानखेडेंनी उत्तर द्यावे’
मूनमून धामेचा क्रूझवर ज्या खोलीत होती तिथल्या झडतीचा हा व्हिडिओ आहे. तिथे सॅनिटरी पॅड्समध्ये ड्रग्ज लपवल्याचं आढळून आलं आहे, असा दावा एनसीबीकडून करण्यात आला आहे. याप्रकरणात ज्या तरुणींना अटक करण्यात आली आहे त्यांनीही ड्रग्ज लपवण्यासाठी सॅनिटरी पॅड्सचा वापर केला होता तर तरुणांनी शूजमध्ये ड्रग्ज लपवले होते, असाही एनसीबीचा दावा आहे.
दरम्यान, मूनमूनचा भाऊ सिद्धांत याने तिच्यावरील सर्व आरोप फेटाळले आहेत. एनसीबीकडून मूनमूनवर चुकीच्या पद्धतीने कारवाई करण्यात आली असून तिच्यावरील सर्व आरोप खोटे आहेत, असे सिद्धांत म्हणाला. मूनमून सध्या न्यायालयीन कोठडीत आहे. तिला भायखळा कारागृहात ठेवण्यात आले आहे. शुक्रवारी तिने अंतरिम जामिनासाठी केलेला अर्ज फेटाळण्यात आला आहे. मूनमून ही मॉडेल असून मध्य प्रदेशमधील सागर येथील आहे. काही वर्षे दिल्लीत भावाकडे तिचे वास्तव्य होते. करोना काळात मात्र ती सागर येथेच होती. आर्यन आणि अरबाज यांना ओळखत नसल्याचा दावाही तिने केलेला आहे.
वाचा: आर्यन खानचा आर्थर रोड जेलमधील मुक्काम वाढणार; ‘हे’ आहे कारण…