तेलुगू देसम पक्ष, भाजप आणि जनसेना यांच्या आमदारांच्या संयुक्त बैठकीला संबोधित करताना ते बोलत होते. ‘आमच्या सरकारने तीन राजधानींच्या नावाखाली कोणताही खेळ केला नाही. आपली राजधानी अमरावती आहे,’ असे त्यांनी स्पष्ट केले. सन २०१४-२०१९दरम्यान विभाजित आंध्र प्रदेशचे पहिले मुख्यमंत्री म्हणून त्यांनी अमरावतीला राजधानी करण्याचा विचार समोर ठेवला होता, परंतु सन २०१९मध्ये त्यांचा पक्ष सत्तेतून बाहेर गेल्याने त्यांच्या या विचाराला धक्का बसला. वाय. एस. जगनमोहन रेड्डी यांच्या नेतृत्वाखालील वायएसआरसीपीने निवडणुकीत विजय मिळवल्यानंतर रेड्डी यांनी अमरावतीला राजधानी करण्याच्या योजनेला बगल दिली. तीन राजधानींचा नवा सिद्धांत मांडला. नायडू यांनी आता एकच राजधानीचा निर्णय घेतला आहे.
नायडू यांना आज मुख्यमंत्रिपदाची शपथ
आंध्र प्रदेश विधानसभेत मंगळवारी नायडू यांची राष्ट्रीय लोकशाही आघाडीचे (एनडीए) नेते म्हणून निवड करण्यात आली. विजयवाडा येथे तेलुगू देसम पक्ष, जनसेना आणि भारतीय जनता पक्षाच्या आमदारांची बैठक झाली. यामध्ये आमदारांनी सर्वसंमतीने नायडू यांची एनडीएचे नेते म्हणून निवड केली. जनसेनाचे प्रमुख पवन कल्याण यांनी एनडीएचे नेते म्हणून नायडू यांच्या नावाचा प्रस्ताव ठेवला. राज्याचे भाजप प्रदेशाध्यक्ष डी. पुरंदेश्वरी यांनी याला समर्थन दिले. यामुळे नायडू यांची मुख्यमंत्रिपदाचे उमेदवार म्हणूनही निवड झाली. नायडू आज, बुधवारी आंध्र प्रदेशचे मुख्यमंत्री म्हणून चौथ्यांदा शपथ घेणार आहेत. पंतप्रधान नरेंद्र मोदी, केंद्रीय गृहमंत्री अमित शहा, केंद्रीय मंत्री जे. पी. नड्डा आदी यावेळी उपस्थित राहण्याची शक्यता आहे.