हायलाइट्स:
- दुसऱ्या मजल्यावरून खाली पडून महिलेचा मृत्यू
- अपार्टमेंटमध्ये मसाज पार्लर सुरू असल्याची माहिती
- महिला दुसऱ्या मजल्यावरून खाली कशी पडली याचाही तपास सुरू
कोल्हापूर : इमारतीच्या दुसऱ्या मजल्यावरून खाली पडून महिलेचा मृत्यू झाला आहे. शहरातील राजारामपुरी अकरावी गल्लीत ही घटना घडली असून शोभा कांबळे असं मृत महिलेचं नाव आहे. या अपार्टमेंटमध्ये मसाज पार्लर सुरू असल्याची माहिती पुढे आली आहे. मात्र, महिलेच्या मृत्यूचं नेमकं कारण अद्याप स्पष्ट झालेलं नाही.
राजारामपुरी येथील जितकर अपार्टमेंटमधील दुसऱ्या मजल्यावरील फ्लॅट भाड्याने दिला आहे. मंगळवारी दुपारी याच फ्लॅटमधून एक महिला खाली पडली. रस्त्याच्या बाजूला ती महिला रक्ताच्या थारोळ्यात पडली होती. या घटनेची माहिती कळताच नागरिकांनी मोठी गर्दी केली.
परिसरातील नागरिकांनी घटनेची माहिती राजारामपुरी पोलिसांना कळवली. पोलिसांनी घटनास्थळी धाव घेऊन महिलेस सीपीआर रुग्णालयात दाखल केले, पण उपचारापूर्वीच तिचा मृत्यू झाल्याचं डॉक्टरांनी जाहीर केलं. पोलिसांनी महिलेची ओळख पटवण्याचं काम सुरू केली असता शोभा कांबळे असं महिलेचं नाव असल्याची माहिती समोर आली आहे.
दरम्यान, जितकर अपार्टमेंटमध्ये मसाज पार्लर सुरू होते का, याची खातरजमा पोलीस करत आहेत. तसंच संबधित महिला खाली कशी पडली याचाही तपास करण्यात येत आहे.