भारत संचार निगम लिमिटेड अर्थात बीएसएनएलच्या डेटाचा भंग झाला आहे. डिजिटल रिस्क मॅनेजमेंट फर्म एथेनियन टेकच्या अहवालात हा दावा करण्यात आला आहे. ईटीच्या म्हणण्यानुसार, या अहवालात असे म्हटले आहे की, ग्राहकांची वैयक्तिक माहिती हॅकर्सपर्यंत पोहोचली आहे. यामध्ये इंटरनॅशनल मोबाइल सब्सक्राइबर आयडेंटिटी (IMSI) नंबर, सिम कार्ड तपशील, घराचे लोकेशन आणि अनेक महत्त्वाचे सुरक्षा क्रमांक समाविष्ट आहेत. सहा महिन्यांतील ही दुसरी घटना आहे. यापूर्वी डिसेंबर २०२३ मध्ये असे प्रकरण समोर आले होते.
बीएसएनएलचा 278 जीबी डेटा हॅकर्सकडे
ईटी या वृत्तपत्राशी बोलताना, अथेनियनचे टेक चीफ एक्झिक्युटिव्ह कनिष्क गौर यांनी सांगितले की, किबरफँटएमने या डेटा भंगाची जबाबदारी घेतली आहे. या उल्लंघनात बीएसएनएलचा 278 जीबी डेटा हॅकर्सकडे गेला आहे. त्यांच्याकडे सर्व्हर स्नॅपशॉट्स देखील आहेत ज्याचा वापर सिम क्लोन करण्यासाठी आणि इतर गुन्हेगारी ॲक्टिव्हिटी करण्यासाठी केला जाऊ शकतो. हॅकरने या डेटाची किंमत 4,17,000 रुपये विक्रीसाठी ठेवली आहे. गौर म्हणाले की, झालेला डेटा भंग अतिशय गुंतागुंतीचा आणि महत्त्वाचा आहे ज्याचा परिणाम केवळ सामान्य युजर्सवरच होणार नाही तर बीएसएनएलच्या मोठ्या ऑपरेशनल सिस्टीमसाठीही घातक ठरू शकतो.
लोकांना धोका कसा
हॅकर्स हा डेटा सायबर हल्ल्यांसाठी वापरू शकतात. यामुळे बीएसएनएलच धोक्यात आले नसून राष्ट्रीय सुरक्षेवरही प्रश्नचिन्ह निर्माण झाले आहे. याशिवाय, सिम कार्डची माहिती वापरून, हॅकर्स एखाद्याची आर्थिक माहिती मिळवू शकतात आणि नंतर त्यांच्या मालमत्तेवर हल्ला करू शकतात. शेवटच्या डेटा उल्लंघनात फायबर आणि लँडलाइन युजर्सचा डेटा समाविष्ट होता.
बीएसएनएलने सेफ्टी स्टॅण्डर्ड वाढवण्याची गरज
आता ज्या डेटाचा भंग झाला आहे तो बीएसएनएलचे टेलिकम्युनिकेशनऑपरेशन्स, नेटवर्क डीटेल्स आणि बीएसएनएलच्या ऑपरेशन मोडवर परिणाम करू शकतो. याप्रकरणी बीएसएनएलने तातडीने तपास सुरू करून या हॅकिंगवर तात्काळ नियंत्रण आणावे, असे गौर यांचे म्हणणे आहे. बीएसएनएलने आपली सेफ्टी स्टॅण्डर्ड वाढवण्याची गरज असल्याचेही ते म्हणाले.