हायलाइट्स:
- मराठा आरक्षण प्रश्नी संभाजीराजे राज्य सरकारवर झाले नाराज.
- राज्य सरकारने दिलेली आश्वासने पाळली नाहीत- संभाजीराजे.
- २५ ऑक्टोबरपासून राज्यव्यापी दौरा सुरू करणार- संभाजीराजे.
कोल्हापूर: मराठा समाजाच्या प्रलंबित मागण्यांसंदर्भात (Maratha Reservation) राज्य सरकारने दिलेली आश्वासने पाळली नसल्याचे सांगत आता संभाजीराजे (Sambhajiraje) यांनी पुन्हा एकदा आक्रमक भूमिका घेतली आहे. चर्चा फार झाल्या, आता पुन्हा चर्चा नको असे सांगत संभाजीराजेंनी रायगड किल्ल्यावरून राज्यव्यापी दौरा सुरू करण्याची घोषणा केली आहे. संभाजीराजेंचा हा राज्यव्यापी दौरा येत्या २५ ऑक्टोबरपासून सुरू होत आहे. (mp sambhaji raje angry with the state government and will start statewide tour from october 25 for maratha reservation issue)
राज्य सरकारबाबत व्यक्त केली नाराजी
मराठा आरक्षणप्रश्नी राज्य सरकारसोबत बैठकाही झाल्या. या बैठकांमध्ये राज्य सरकारने अनेक आश्वासने दिली. मात्र त्या आश्वासनांपैकी केवळ एक सारथी सोडलं तर या सरकारने दुसरं काहीएक केलेलं नसल्याचं म्हणत संभाजीराजे यांनी राज्य सरकारबाबत तीव्र नाराजी व्यक्त केली आहे. आता यापुढे चर्चा नको आता दौरा सुरू करणार असं संभाजीराजे म्हणाले.
क्लिक करा आणि वाचा- ‘कुणी तुमच्या खिशात पुडी टाकून तुम्हाला अटक करेल’; पवारांचा एनसीबीवर हल्लाबोल
राज्य सरकार आपली जबाबदारी पाळत नसल्याचं दिसत आहे. सरकारला आम्ही अल्टिमेटमही दिलं होतं. मात्र, सरकारनं दिलेली आश्वासने पाळलेलीच नाहीत. आता चर्चेचा विषयच नाही, असे सांगत आता आणखी काय चर्चा करायची असा सवालही संभाजीराजे यांनी उपस्थित केला.
‘टीका करण्यापेक्षा समाजासाठी वेळ द्यावा’
संभाजीराजे यांनी सरकारबाबत नाराजी व्यक्त करतानाच आपल्या टीकाकारांनाही उत्तर दिलं आहे. कुणी टीका करत असेल तर मी त्याकडे लक्ष देत नसल्याचं ते म्हणाले. टीकाकारांनी टीका करण्यापेक्षा त्यांनी समाजासाठी आपला वेळ द्यावा, असे आवाहनही त्यांनी केले आहे. यावेळी त्यांनी उदयनराजे भोसले यांनी टीकेवरही आपलं मत व्यक्त केलं. साताऱ्याची गादी आणि कोल्हापूरची गादी यांमध्ये फरक नसल्याचे सांगत उदयनराजे नेमकं काय म्हणाले ते मला माहीत नाही, असं संभाजीराजे म्हणाले.
क्लिक करा आणि वाचा- मावळ घटनेला भाजप जबाबदार, लोकांच्या हे लक्षातही आलं: पवार
काय केली होती उदयनराजेंनी टीका?
मराठा आरक्षणाची मशाल चुकीच्या व्यक्तीच्या हातात आहे अशी टीका उदयनराजे भोसले यांनी केली होती. त्यावर संभाजीराजे यांनी ही प्रतिक्रिया व्यक्त केली आहे.
क्लिक करा आणि वाचा- पाक, यूपीतील हॅकर्सनी केला पोलिस अधिकाऱ्याचा ईमेल हॅक; सरकारी खात्यांमध्ये खळबळ