मोदी सरकारचे वर्तन घटनाबाह्य आणि गुन्हेगारी स्वरूपाचे
के. सी. वेणुगोपाल यांनी ‘अ‍ॅपल’कडून मिळालेल्या संदेशाचे ‘स्क्रीन शॉट’ ‘एक्स’ या समाजमाध्यमावर प्रसृत करीत मोदी सरकारला लक्ष्य केले . ‘माझ्या फोनमध्येही तुमचे दुष्ट स्पायवेअर पाठवल्याबद्दल धन्यवाद मोदीजी . तुमच्या खास भेटीचा संदेश ‘अ‍ॅपल’ने मला पाठवला आहे’, असे वेणुगोपाल यांनी ‘एक्स’वर नमूद केले . ‘मोदी सरकारचे वर्तन घटनाबाह्य आणि गुन्हेगारी स्वरूपाचे आहे . हे सरकार विरोधकांना लक्ष्य करून त्यांच्या खासगीपणावर आक्रमण करीत आहे’, असे वेणुगोपाल यांनी म्हटले आहे .
फोन स्पायवेअरद्वारे पुन्हा हॅक?
‘राज्यघटनेवरील हल्ला आणि भाजपच्या फॅसिस्ट प्रवृत्तीविरोधात मतदारांनी लोकसभा निवडणुकीत कौल दिला. मात्र, भाजपच्या वर्तनात बदल झालेला नाही. सरकारच्या या घटनाबाह्य कृतीविरोधात पूर्ण ताकदीनिशी लढू’, असा इशारा के. सी. वेणुगोपाल यांनी दिला आहे. आयफोनमध्ये स्पायवेअर असल्याबद्दल अ‍ॅपलने वेणुगोपाल यांना ३० ऑक्टोबर २०२३ रोजी संदेश पाठवला होता. मात्र, त्यांचा फोन स्पायवेअरद्वारे पुन्हा हॅक करण्यात आल्याचे ताज्या संदेशात म्हटले आहे . या स्पायवेअरबद्दल अचूक माहिती देणे अशक्य असले , तरी हॅकिंगचा प्रयत्न झाल्याबद्दल अ‍ॅपलची माहिती बिनचूक असल्याने हा इशारा गांर्भीयाने घ्या , असे वेणुगोपाल यांना पाठवलेल्या संदेशात नमूद करण्यात आले आहे .
९८ देशांतील वापरकर्त्यांना आम्ही फोन हॅकिंगचे संदेश – अ‍ॅपल
‘जगभरात स्पायवेअर द्वारे मोबाइल फोन हॅक करण्यासाठी कोट्यवधी डॉलर खर्च केले जातात. सन २०२१पासून हॅकिंग बद्दल आम्ही अनेकांना असे संदेश पाठवले आहेत. जगातील ९८ देशांतील वापरकर्त्यांना आम्ही फोन हॅकिंगचे संदेश पाठवले आहेत’, असेही ‘अ‍ॅपल’ने म्हटले आहे .