कल्याण : रेल्वेला हिरवा सिग्नल देत रेल्वे मार्गस्थ करण्यासाठी नेमलेला गेटमन फाटक उघडे ठेवून झोपल्याची घटना मंगळवारी रात्री २च्या सुमारास डोंबिवली मोठागाव रेल्वे फाटकात घडली. याचा व्हिडीओ सोशल मीडियावर व्हायरल झाला असून, या घटनेची चौकशी केली जाणार असल्याचे रेल्वे प्रशासनाने म्हटले आहे.

डोंबिवली पश्चिमेकडील मोठागाव परिसरात राहणाऱ्या नागरिकांना दिवा-वसई रेल्वे मार्गावरील फाटकातून ये-जा करावी लागते. हे फाटक बंद करण्यासाठी ‘एमएमआरडीए’च्या माध्यमातून उड्डाणपूल प्रस्तावित असले तरी सध्या वाहनचालक आणि रहिवासी फाटकाचाच वापर करतात. हे फाटक खुले व बंद करण्यासाठी रेल्वेकडून अधिकृत गेटमन नेमण्यात आला आहे. ड्युटीवर असलेला हा गेटमन फाटक उघडे ठेवून केबिनचा दरवाजा बंद करून झोपला होता. नेहमीप्रमाणे या मार्गावरून भिवंडीकडून कोपरकडे जाणारी रेल्वे फाटकात लाल सिग्नल असल्याने काही अंतरावर थांबवण्यात आली. गाडीच्या हेडलाइटचा प्रकाश पाहून नागरिक आणि वाहनचालकांनी फाटक ओलांडणे थांबवले. मात्र बराच वेळ गेट बंद होत नसल्याने उपस्थितांनी केबिनकडे मोर्चा वळवला. केबिनचा दरवाजा वारंवार ठोठावल्यानंतर बराच वेळाने गेटमन बाहेर आला. नागरिकांनी गाडी सिग्नलसाठी थांबल्याचे सांगताच लगबगीने त्याने गेट बंद करत रेल्वेला हिरवा सिग्नल दिला. यानंतर या मार्गावरून गाडी मार्गस्थ झाली.

जगभरात करोना पुन्हा धुमाकूळ घालत असताना महाराष्ट्रासाठी दिलासादायक बातमी; महत्त्वाची आकडेवारी समोर

दरम्यान, खुल्या गेटसह सिग्नलवर गाडी थांबल्याचा आणि नागरिक गेटमनच्या केबिनचा दरवाजा ठोकावतानाचा व्हिडीओ रेल्वे प्रशासनाला ट्वीट करत नागरिकांच्या जीवाशी खेळणाऱ्या या कर्मचाऱ्यावर तत्काळ कारवाईची मागणी करण्यात आली आहे.

गेट खुले असल्याने लाल सिग्नलमुळे गाडी थांबली होती. उघड्या गेटवर अपघाताची शक्यता नव्हती; मात्र कारण नसताना गाडी सिग्नलवर थांबवून ठेवणे योग्य नाही. व्हिडीओमध्ये दिसत असल्याप्रमाणे गेटमन खरोखरच ड्युटीवर झोपला होता का, हा व्हिडीओ नक्की कधीचा आहे, याबाबतची चौकशी सुरू आहे. यात तो दोषी आढळल्यास कारवाई केली जाईल.

– प्रवीण पाटील, जनसंपर्क अधिकारी