लोकलच्या दारात लटकून प्रवास, सिग्नलवर आदळून तरुण ट्रॅकवर पडला, सतर्क करणारा व्हिडिओ

मुंबई : मुंबईतील उपनगरी लोकल रेल्वेमधील वाढती गर्दी हा चिंतनाचा विषय ठरत आहे. मध्य रेल्वे असो किंवा पश्चिम रेल्वे, पिक अवरमध्ये गर्दीचा रेटा वाढतानाच दिसतो. हातावर पोट असलेल्या कर्मचाऱ्यांना कामाच्या ठिकाणी पोहोचण्यासाठी कधीकधी स्वतःला गर्दीत झोकून द्यावं लागतं. मग कधी चेंगराचेंगरी होते, कधी धक्काबुक्की, तर कधी मारामारी. कधी तर लोकलच्या दारात उभं राहून लटकत प्रवास करण्याची वेळही येते. अशाच एका घटनेत लोकलच्या दरवाजात लटकणाऱ्या प्रवाशाचा अपघात झाला होता. रेल्वे ट्रॅक शेजारील एका सिग्नलच्या खांबावर आदळल्यामुळे १८ वर्षीय मजूर धावत्या लोकलमधून खाली पडला होता. सुदैवाने त्याचे प्राण बचावले असले, तरी तो गंभीर जखमी झाला होता. गेल्या वर्षी घडलेल्या घटनेचा व्हिडिओ पुन्हा एकदा व्हायरल झाला आहे.

नेमकं काय घडलं होतं?

जून २०२२ मध्ये सकाळी गर्दीच्या वेळी ठाण्याहून लोकलमधील मोटर कोचच्या बंद दाराला लटकून येत असताना १८ वर्षीय तरुण सिग्नलच्या खांबाला धडकला होता. धावत्या ट्रेनमधून पडल्यामुळे तो जखमी झाला होता. कळव्यातील भास्कर नगर येथील रहिवासी असलेल्या दानिश हुसेन खान हा मोटर कोचच्या बंद दाराला इतर तीन प्रवाशांसह लटकत होता.

घटना कॅमेरात कैद

सकाळी साडेनऊ वाजताच्या सुमारास ही घटना घडली होती. कळवा आणि ठाणे स्थानकांदरम्यान धीम्या मार्गावरील सिग्नलच्या खांबाला धडकल्याने दानिशचा तोल गेला आणि तो रुळावर पडला होता. पुण्याहून मुंबई छत्रपती शिवाजी महाराज टर्मिनसच्या दिशेने जाणाऱ्या डेक्कन क्वीनमधून प्रवास करणाऱ्या काही प्रवाशांनी ही घटना मोबाईल कॅमेऱ्यात कैद केली होती. या घटनेचे व्हिडिओ अल्पावधीतच सोशल मीडियावर व्हायरल झाले होते. वर्षभरानंतर हा सतर्क करणारा व्हिडिओ पुन्हा व्हायरल होत आहे.
Babajani Durrani : शब्दात अडकलेल्या अजितदादांनी तिकीट नाकारलं, दुर्रानी नाराज, शरद पवारांकडे घरवापसीचे संकेत
या व्हिडिओमध्ये दानिश सिग्नलच्या खांबाला घासून मागे फिरण्याच्या प्रयत्नात तो लोकलच्या दारातून घसरुन पडताना दिसत आहे. जीआरपीनी दिलेल्या माहितीनुसार, पडल्यानंतर अंदाजे २० मिनिटांतच दानिशचे नातेवाईक आणि इतर काही जणांनी त्याला रिक्षाने जवळच असलेल्या कळवा येथील छत्रपती शिवाजी महाराज रुग्णालयात दाखल केले. दानिशच्या हातापायाला गंभीर जखमा झाल्या होत्या.
Uddhav Thackeray : भाजपला हादरा, गडकरींच्या उपस्थितीत पक्षप्रवेश करणारा बडा नेता उद्धव ठाकरेंच्या शिवसेनेत
लोकल एक गेल्यास दुसरी येईल, मात्र जीव पुन्हा येणार नाही. कामापेक्षा स्वतःच्या जीवाला जपा, विनाकारण प्राण धोक्यात टाकू नका, असं आवाहन सोशल मीडियावर केलं जात आहे.