महिला मृत्यूच्या दारात, गावकऱ्यांनी रुग्णालयात आणलं; डॉक्टर दारुच्या नशेत आणि…काय प्रकरण?

म.टा. प्रतिनिधी, नागपूर : ग्रामीण भागातील सरकारी दवाखान्यांमधील सुविधा आणि तेथील डॉक्टरांची कार्यतत्परता हा नेहमीच चर्चेचा विषय राहिला आहे. त्यातच नरखेड तालुक्यातील मोवाड येथील एका घटनेने एका सरकारी डॉक्टरची चांगलीच पोलखोल केली आहे. आत्महत्येचा प्रयत्न करणारी एक महिला मृत्यूशी लढा देत असताना कर्तव्यावर असलेला आरोग्य अधिकारी दारूच्या नशेत तल्लीन होऊन शासकीय निवासस्थानावर पडून असल्याचा आरोप झाला आहे.
Manu Bhaker : ऐतिहासिक कामगिरीनंतर मनूचे नशिब बदलले; आता कोटींमध्ये खेळणार; एक दोन नव्हे तर इतक्या ब्रँड्सकडून ऑफर

काय आहे प्रकरण?

मोवाड प्राथमिक आरोग्य केंद्रात शुक्रवारी ही घटना घडली. डॉ. मयूर बोपचे यांच्याकडे या प्राथमिक आरोग्य केंद्राचा कार्यभार असून डॉ. प्रवीण उमरगेकर हे दुय्यम वैद्यकीय अधिकारी आहेत. शुक्रवारी २ ऑगस्ट रोजी डॉ. प्रवीण उमरगेकर कामावर होते. शुक्रवारी सकाळी १०च्या सुमारास मोवाड येथील एका २८ वर्षीय विवाहित महिलेने घरगुती वादावरून विष प्राशन करून आत्महत्येचा प्रयत्न केला. तिला मोवाड प्राथमिक आरोग्य केंद्रात नेले. त्यावेळी तेथील आरोग्य अधिकारी गैरहजर होते. कर्तव्यावर असलेले डॉ. उमरगेकर त्यांच्या शासकीय निवासस्थानी दारूच्या नशेत तल्लीन अवस्थेत पलंगावर पडले होते, असा आरोप करण्यात आला आहे. तसेच डॉ. मयूर बोपचे हेही मुख्यालयी नव्हते. यामुळे गावकऱ्यांमध्ये प्रचंड रोष निर्माण झाला.
Ratnagiri News : आई-वडील शेतकरी, लेकाची पहिल्याच प्रयत्नात भरारी; मेहनत-जिद्दीने पोलीस उपनिरीक्षकपदी निवड
घटनेची माहिती मिळताच डॉ. बोपचे यांनी बेलोना येथे आश्रम शाळेतील शिबीरात कार्यरत असलेले डॉ. प्रतीक राऊत यांना संपर्क साधून त्यांना मोवाड येथे जाण्याचे निर्देश दिले. राऊत यांनी मोवाड येथे पोहचून पीडित महिलेवर प्राथमिक उपचार केले. त्यानंतर तिला तात्काळ नागपूरला हलवण्यात आले. दुपारी २ वाजताच्या दरम्यान डॉ. प्रवीण उमरगेकर दारूचा प्रभाव कमी झाल्यानंतर हे प्राथमिक आरोग्य केंद्रात आले.

तोपर्यंत गावकऱ्यांनी पोलिस तक्रार केली होती. त्यामुळे नरखेड पोलिसांनी त्यांना नरखेड ग्रामीण रुग्णालयात वैद्यकीय तपासणी करता नेले. जिल्हा परिषदेचे सदस्य समीर उमप यांनी हा मुद्दा शनिवारी झालेल्या सर्वसाधारण सभेत उपस्थित केला. यावर संबंधित डॉक्टरवर निलंबनाची कारवाई करण्यात आल्याची माहिती प्रशासनाकडून देण्यात आली.