Nashik Godavari Flood: उफाणली गोदामाई! नाशिकमध्ये मोसमातला पहिलाच पूर, गंगापूर धरण ८० टक्क्यांवर

नाशिक : गेल्या आठ दिवसांपूर्वी धरणे भरतील की नाही, या विवंचनेत असलेल्या नाशिककरांवर वरुणराजाने शनिवारी आणि रविवारी मुसळधार कृपावृष्टी केल्याने दिलासा मिळाला आहे. गेल्या दोन दिवसांच्या पावसामुळे गोदावरी नदी रविवारी यंदाच्या मोसमात प्रथमच खळाळून वाहिली. रात्री आठच्या सुमारास दुतोंड्या मारुतीच्या छातीपर्यंत पाणी लागले होते.नाशिककरांची तहान भागविणारे गंगापूर धरणही ८० टक्क्यांवर गेल्याने रात्री आठला आठ हजार क्युसेक, तर नांदूरमध्यमेश्वर धरणातून ५४ हजार २३३ क्युसेक पाण्याचा विसर्ग झाला. नाशिकचा नायगारा म्हणून प्रसिद्ध असलेला सोमेश्वरचा धबधबाही ओसंडून वाहिल्याने तो पाहण्यासाठी नाशिककरांनी रविवारी गर्दी केली. डेंग्यूसह इतर साथीच्या आजारांनी त्रस्त असलेल्या नाशिककरांनी, या दमदार पावसामुळे रोगराईही धुऊन निघेल, अशी आशाही व्यक्त केली. गोदावरीला पूर आल्याने नदीकाठच्या गावांना धोक्याचा इशारा देण्यात आला आहे. दरम्यान, नाशिकमध्ये पुरामुळे दोन जण वाहून गेले, तर जळगाव जिल्ह्यातही तीन जणांचा धरणात बुडून मृत्यू झाला. मालेगाव येथे गिरणा पात्रात मच्छीमार अडकले असून, त्यांच्या सुटकेसाठी रात्री उशिरापर्यंत प्रयत्न सुरू होते.

‘जायकवाडी’कडे चालला प्रवाहो…

– नांदूरमध्यमेश्वर धरणातून ५४,२३३ क्युसेक विसर्ग
– गंगापूर धरणातून ८,००० क्युसेक विसर्ग
– निळवंडे धरणातून २१,८५५ क्युसेक विसर्ग

नाशिककरांना दिलासा…

– गंगापूर धरणाचा जलसाठा ८१ टक्क्यांवर
– हंगामात प्रथमच गंगापूर धरणातून विसर्ग
– रविवारी रात्री आठला तब्बल आठ हजार क्युसेक विसर्ग
चिंताजनक! राज्यात अतिवृष्टीचे १११ बळी; २४ तासांत तिघांच्या मृत्यूची नोंद, १६३ जण जखमी, तर सहा बेपत्ता
अतिवृष्टीमुळे आठ जणांचा मृत्यू

मुंबई/नाशिक : नाशिक जिल्ह्यात अतिवृष्टीमुळे दोन जण वाहून गेले, तर जळगाव जिल्ह्यातील भोकरबारी धरणात पोहण्यासाठी गेलेल्या दोन सख्ख्या भावांसह तिघांचा मृत्यू झाला. अन्यत्र तिघांचा मृत्यू झाल्याने राज्यात गेल्या चोवीस तासांत आठ जणांचा मृत्यू झाला. अनेक ठिकाणी सुरू असलेल्या मुसळधार पावसामुळे राज्यभरात आतापर्यंत एकूण ११० जणांचा मृत्यू झाला असून, १६३ जण जखमी तर सहा जण बेपत्ता असल्याची माहिती राज्य ‘आपत्ती परिस्थिती अहवाला’तून समोर आली आहे.

कुठे काय घडले?

– मालेगावात गिरणा नदीपात्रात काही मच्छीमार अडकले असून, प्रवाह अधिक असल्याने मदतीत अडथळा येत असल्याची माहिती जिल्हा आपत्ती व्यवस्थापनाने दिली.
– कालसर्पची पूजा करण्यासाठी आलेला तरुण गोदावरीच्या पुरात वाहून गेला, तर सुरगाण्यातही एक महिला वाहून गेली