Tej Police Times
Raj Thackeray: विधानसभेसाठी राज ठाकरे मैदानात; २१ ऑगस्टपासून विदर्भ दौऱ्यावर, उमेदवारांची होणार घोषणा?
म.टा. विशेष प्रतिनिधी, नागपूर : महाराष्ट्र नवनिर्माण सेनेचे सर्वेसर्वा राज ठाकरे येत्या २१ ऑगस्टपासून विदर्भाच्या दौऱ्यावर येणार आहेत. मराठवाड्याचा पहिला टप्पा आटोपल्यावर त्यांचा दुसरा टप्पा २० तारखेपासून सुरू होत आहे. या दौऱ्यात काही उमेदवारांची घोषणा करण्याचे संकेत आहेत.
राज ठाकरे यांनी यावेळी स्वबळावर लढण्याची घोषणा केली. त्यांनी अलीकडेच बाळा नांदगावकर व दिलीप धोत्रे यांच्या उमेदवारीची घोषणा केली. आता ते तब्बल सहा दिवस विदर्भाचा दौरा करणार आहेत. जिल्ह्यातील राजकीय स्थितीचा अंदाज घेऊन इच्छुकांबाबत चाचपणी करतील. याखेरीज विविध क्षेत्रातील मान्यवरांनाही ते भेटणार आहेत.
ठाकरे यांचे रेल्वेने २१ तासखेला सकाळी येथे आमगन होईल. रवीभवनात निरीक्षक व पदाधिकाऱ्यांच्या उपस्थितीत विधानसभा मतदारसंघनिहाय बैठका घेतली. रात्री येथे मुक्काम केल्यावर २२ तारखेला भंडाऱ्याला रवाना होतील. दुपारी गोंदियाला निघाल्यावर रात्री मुक्काम राहील. २३ तारखेला गडचिरोली व रात्री वणी येथे मुक्काम करतील. २४ तारखेला वर्धा येथे बैठका व रात्री अमरावती येथे मुक्काम. अमरावती येथे २५ तारखेला बैठका झाल्यावर दुपारी व रात्री अकोला येथे मुक्काम. २६ तारखेला दुपारी शेगाव येथे बुलढाणा जिल्ह्यातील निरीक्षक व पदाधिकाऱ्यांशी चर्चा केल्यानंतर रात्री रेल्वेने मुंबईला रवाना होतील. तत्पूर्वी काही उमेदवारांची ते घोषणा करण्याची शक्यता वर्तवण्यात येत आहे.
आज संभाजीनगरमध्ये
छत्रपती संभाजीनगर: ‘मनसे’प्रमुख राज ठाकरे यांचे आज, शनिवारी (दि. १०) दुपारी बाराला शहरात आगमन होणार असून, सिडको उड्डाणपुलाखाली स्व. वसंतराव नाईक चौकात त्यांचे स्वागत केले जाणार आहे. त्यानंतर सुभेदारी विश्रामगृहात जिल्ह्यातील नऊ विधानसभा क्षेत्रांतील सर्व पदाधिकाऱ्यांसोबत त्यांची बैठक होईल. हॉटेल ताज येथे त्यांचा मुक्काम असून, दुसऱ्या दिवशी सकाळी ते पुण्याकडे रवाना होतील. दरम्यान, शहरातील सर्व बैठका प्रकाश महाजन, दिलीप बनकर, वैभव मिटकर, राजू जावळीकर आदींच्या प्रमुख उपस्थितीत होतील. ठाकरे यांच्या दौऱ्यासाठी सुमित खांबेकर, सतनामसिंग गुलाटी, बिपिन नाईक, गजनगौडा पाटील आदी प्रयत्नशील आहेत.