महिला जिल्हाध्यक्षांची शरद पवारांवर सडकून टीका, अजितदादा म्हणाले, वडिलधाऱ्यांवर टीका नको

नयन यादवाड, कोल्हापूर : आगामी विधानसभा निवडणुकांच्या पार्श्वभूमीवर राष्ट्रवादी काँग्रेस अजित पवार गटाकडून मोर्चेबांधणीला सुरुवात झाली आहे. पक्षाच्या वतीने राष्ट्रीय अध्यक्ष अजित पवार यांच्या उपस्थितीत काल कोल्हापुरात पदाधिकाऱ्यांचा मेळावा आयोजित करण्यात आला होता. या मेळाव्यात राष्ट्रवादी काँग्रेस महिला जिल्हाध्यक्षा शितल फराकटे यांनी शरद पवार यांच्यावर सडकून टीका केली. अजित पवार यांनी शरद पवार यांना खासदार केलं त्यानंतर मोठ्या पवार साहेबांना दिल्लीची स्वप्नं पडू लागली, असं विधान त्यांनी केलं. याची चर्चा अख्ख्या सभागृहात सुरु झाली. मात्र, यानंतर अजित पवार यांनी भाषणासाठी उभे राहताच महिला जिल्हाध्यक्ष शीतल फारकटे यांना खडसावले. आपण केलेलं काम जनतेसमोर घेऊन जा, दुसऱ्यांवर टीका करण्याची गरज नाही, असे सूचक वक्तव्य अजित पवारांनी केलं.

राष्ट्रवादी काँग्रेस पक्षाचे राष्ट्रीय अध्यक्ष अजित पवार यांच्या उपस्थितीत काल कोल्हापुरात बूथ समन्वयक व पदाधिकाऱ्यांचा मेळावा आयोजित करण्यात आला होता. या मेळाव्याला पालकमंत्री हसन मुश्रीफ, चंदगडचे आमदार राजेश पाटील यांच्यासह राष्ट्रवादी काँग्रेस पक्षाचे पदाधिकारी व कार्यकर्ते मोठ्या प्रमाणात उपस्थित होते. यावेळी राष्ट्रवादी काँग्रेस पक्षाच्या महिला जिल्हाध्यक्षा शितल फराकटे यांनी केलेल्या भाषणाची चर्चा जोरदारपणे झाली.
Rajya Sabha Election : राज्यसभेसाठी भाजपकडून नाव फिक्स, तर काँग्रेसमधून आलेला नेता अजितदादांचा उमेदवार?
या भाषणात शितल फराकटे यांनी थेट शरद पवार यांच्यावर आपली टीकेची तोफ डागली. फारकटे म्हणाल्या, राष्ट्रवादी काँग्रेस पक्षाचे राष्ट्रीय अध्यक्ष अजित पवार यांनी शरद पवार साहेबांना खासदार केले. त्यानंतर मोठ्या पवार साहेबांना दिल्लीची स्वप्नं पडू लागली. अजितदादांनी राष्ट्रवादी पक्ष वाढवला आहे. काही दिवसांपूर्वी अजित पवार यांनी वेगळी भूमिका घेतल्यानंतर त्यांच्यावर जोरदार टीका झाली. आम्हाला निष्ठा शिकवली गेली. पण ज्या काँग्रेसने तुम्हाला ओळख दिली त्या काँग्रेसच्या पाठीत एकदा नाही तर अनेक वेळा खंजीर खुपसून वेगळी भूमिका घेणाऱ्यांनी आम्हाला निष्ठा शिकवू नये, अशी टीका शीतल फारकटे यांनी केली.

इतकेच नव्हे तर शितल फराकटे यांनी खासदार सुप्रिया सुळे यांच्यावरही टीका करत स्वतःला संसदरत्न खासदार म्हणवणाऱ्या ताई लाडकी बहीण योजनेवर टीका करत आहेत असेही त्या म्हणाल्या. या वक्तव्यानंतर सभागृहात या विधानाची चर्चा सुरू झाली.
Hasan Mushrif : महायुतीचा पहिला उमेदवार जाहीर, अजितदादांची थेट घोषणा, भाजप इच्छुकाच्या मनसुब्यांना सुरुंग
अजितदादांनी भाषणाला उभे राहताच कार्यकर्त्यांचे कान टोचायला सुरुवात केले. लोकसभा निवडणुकीत मंत्री चंद्रकांत पाटील यांनी ज्येष्ठ नेते शरद पवार यांच्यावर केलेल्या टीकेचा फटका पक्षाला बसला होता. त्यामुळे विधानसभा निवडणुकीच्या तोंडावर वडीलधाऱ्यांचा अपमान होईल असे बोलू नका, अशा शब्दांत अजित पवार यांनी महिला जिल्हाध्यक्ष शितल फराकटे यांना सुनावलं. तसेच कागल, चंदगड पुरता मर्यादित राष्ट्रवादी काँग्रेस पक्ष ठेवू नका त्याच्याबाहेर कार्यक्षेत्र वाढवा. अनेक वर्षे पालकमंत्री पद मिळाले नव्हते. आता हसन मुश्रीफ आहेत. त्यामुळे पक्ष मजबूत करा असे आवाहन पवार यांनी केले.