नांदेडचे खासदार वसंत चव्हाण यांची प्रकृती खालावली, तातडीने हैदराबादला नेणार

अर्जुन राठोड, नांदेड : नांदेडचे काँग्रेसचे नवनिर्वाचित खासदार वसंत चव्हाण यांची प्रकृती खालावली आहे. यकृतामध्ये इन्फेक्शन झाल्याने त्यांना नांदेडमधील खासगी रुग्णालयात दाखल करण्यात आले आहे. त्यांना श्वास घेण्यास अडचण येत आहे तसेच कमी रक्तदाबाचा त्रासही त्यांना होत असल्याची माहिती डॉक्टरांनी दिली आहे. त्यांना एअर अॅम्ब्युलन्सने साडे पाच वाजता हैदराबादला नेणार असल्याचीही माहिती मिळत आहे.

प्रत्येक महिन्याच्या १० तारखेला ते डायलसिस करतात. पण नांदेडमध्ये आयोजित काँग्रेसच्या विभागीय बैठकीमुळे त्यांना नियमित आरोग्य चाचण्या करणे जमले नाही. त्यामुळे त्यांची तब्येत बिघडल्याची प्राथमिक माहिती मिळते आहे. मंगळवारी सकाळच्या सुमारास त्यांना अस्वस्थ वाटू लागले. लगोलग त्यांना नांदेडमधील खासगी रुग्णालयात दाखल करण्यात आले. डॉक्टरांच्या प्राथमिक उपचारानंतर त्यांना बरे वाटू लागले. मात्र कोणताही धोका न पत्करता त्यांना तातडीने एअर अॅम्ब्युलन्सने हैदराबादला नेणार असल्याची माहिती कळतेय.

नांदेडच्या बैठकीमुळे वसंतरावांची धावपळ आणि दगदग

आगामी विधानसभेसाठी काँग्रेसकडून उमेदवारांची चाचपणी सुरू करण्यात आली असून त्यासाठी पक्षातील प्रमुख नेते महाराष्ट्र दौऱ्यावर आहेत. नांदेड, हिंगोली आणि लातूर जिल्ह्याची एकत्रित बैठक नांदेडमध्ये पार पडली. यंदा लोकसभा निवडणुकीत लातूर आणि नांदेडमध्ये काँग्रेसचे उमेदवार जिंकल्याने बैठकीत वेगळाच उत्साह होता. लातूरचे खासदार शिवाजीराव काळगे आणि नांदेडचे खासदार वसंतराव चव्हाण यांच्याकडे बैठकीचे नियोजन होते.

श्वास घेण्यास अडचण, कमी रक्तदाबाचाही त्रास

नांदेडच्या बैठकीमुळेच नियोजित आरोग्य चाचण्या त्यांनी पुढे ढकलण्याचा निर्णय घेतला. मात्र दोन दिवसांतच त्याचे परिणाम त्यांना दिसू लागले. दगदग आणि धावपळीमुळे कालपासून त्यांना चालताना धाप लागत होती. तसेच श्वास घेण्यास त्यांना अडचण होत होती. दरम्यान, कमी रक्तदाबाचा त्रासही त्यांना होऊ लागला.

एअर अॅम्बुलन्सने हैदराबादला हलविण्यात येणार

मंगळवारी सकाळीच त्यांना अधिक त्रास होऊ लागल्यावर नांदेडच्या खासगी रुग्णालयात दाखल करण्यात आले. डॉक्टरांनी त्यांच्यावर प्राथमिक उपचार केले. परंतु कोणताही धोका न पत्करता त्यांना हैदराबाद येथील रुग्णालयात दाखल करण्याचा निर्णय घेण्यात आला आहे. त्यानुसार साडे पाच वाजता त्यांना एअर अॅम्बुलन्सने हैदराबादला हलविण्यात येणार आहे.