सासरी बोलावलं अन् विद्युत तारेचा शॉक देऊन पतीला संपवलं, क्रूर पत्नीचा हादरवणारा कारनामा

सिंधुदुर्ग : सिंधुदुर्गामध्ये नात्याला काळीमा फासणारी घटना घडली आहे. कुडाळ तालुक्यातील माणगाव येथील तरुण वसंत उर्फ सागर भगे यांना विद्युत तारांच्या जाळ्याचा शाॅक देऊन ठार केल्याप्रकरणी मयतच्या पत्नीसह सासू सासऱ्यांवर कारवाई करण्यात आली आहे.

मिळालेल्या माहितीनुसार,वेंगुर्ले तालुक्यातील आडेली सातेरी गाळू येथे सासरवाडीच्या मालकीच्या जागेत राहत्या घराच्या कंपाउंड मधील नर्सरीत कुडाळ तालुक्यातील माणगाव तळीवाडी येथील तरुण वसंत उर्फ सागर प्रभाकर भगे (वय ३२) यांना त्यांच्या पत्नीने तसेच सासू सासऱ्याने आडेली येथे बोलावून घेतले. घराच्या कंपाउंड भोवती विद्युत तारेचे जाळे तयार करून त्या विद्युत तारांच्या जाळ्यांचा शाॅक देऊन ठार मारले. वेंगुर्ले पोलिसांनी मयत वसंत उर्फ सागर भगे यांची पत्नी नुतन शंकर गावडे (सुप्रिया सागर भगे) वय २८, सासरे शंकर सखाराम गावडे (वय ६०) व सासू पार्वती शंकर गावडे (वय ५५ सर्व राहणार आडेली सातेरी येथील) या तिघांविरुद्ध गुन्हे दाखल करून अटक केली आहे.

दरम्यान, मयत सागर भगे यांचा भाऊ संगम प्रभाकर भगे यांनी वेंगुर्ले पोलीस ठाण्यात दिलेल्या तक्रारीमध्ये असे म्हटले आहे की, आडेली सातेरीगाळू येथे रहाणारी नूतन शंकर गावडे (वय २८ वर्षे) हिच्याशी २४ डिसेंबर २०२३ रोजी सागर याचे लग्न झाले. लग्नानंतर नूतन हिचे नाव सुप्रिया असे ठेवण्यात आले. नुतन गावडे ही आमच्या घरी माणगाव तळीवाडी येथे तिच्या सासरी रहाण्यास आली, परंतु लग्नानंतर सुमारे ४ ते ५ दिवसानंतर तीने भाऊ सागर याच्याशी तु इथे रहायचे नाही, तु माझ्या सोबत माहेरी रहायचे असे सांगून भांडण केले व ती आपल्या माहेरी आडेली येथे निघून गेली. त्या

नंतर भाऊ वसंत याने तिला समजविण्याचा खूप प्रयत्न केला. परंतु ती सासरी यायला तयार होत नसल्याने, भाऊ सागर याने तिच्या हट्टापोटी तिच्यासोबत आडेली येथे रहाण्याचा निर्णय घेतला. तो तिच्यासोबत राहू लागला. काही दिवसांनी नूतन ही तिच्या वडिलांसोबत सासरी आमच्या घरी आली आणि तिने लग्नात दिलेल्या चिजवस्तू दागिने वगैरे घेवून परत आपल्या माहेरी निघून गेली. याबत कामावरून आल्यावर सागर याने या प्रकाराबाबत पत्नीला विचारले असता पत्नी नूतन व तिच्या आई-वडिलांनी त्याला मारहाण केली. त्यानंतर सदरचे प्रकरण वेंगुर्ला पोलीस ठाणे येथे आले. तेथे सदर प्रकरण सागर याने सामोपचाराने मिटविले. त्या नंतर नूतन सोबत नांदावयाचे असल्याने, त्याने वेळोवेळी मध्यस्ती घालून नुतनला आपल्या सोबत रहा असं सांगण्याचा प्रयत्न केला. परंतु नुतन त्याच्यासोबत रहाण्यास तयार झाली नाही. परंतु भाऊ सागर याला नुतन ही अधून मधून फोन करुन त्याच्या सोबत बोलत होती.

काल १२ ऑगस्ट रोजी रात्री पत्नी नूतन गावडेने आडेली येथे घरी बोलावले म्हणून सागर हा दोन मित्रांसमवेत कार मधून रात्री १२.३० वा. च्या सुमारास आडेली सातेरी गाळु येथे गेला. त्यानंतर भाऊ सागर याने त्यांना लांब उभे रहाण्यास सांगितले व तो आडवाटेने नुतन हिच्या घराकडे गेला. त्याला जावून बराच कालावधी होवून देखील तो परत न आल्याने बरोबर गेलेल्या दोघांनी त्याला बऱ्याच हाका मारल्या, परंतु सागर हा सकाळी ४.०० वाजले तरी बाहेर येत नसल्याचे त्यांनी ही बाब गावात कळविली. सकाळी ६.३० वा. च्या दरम्याने आडेली सातेरी गाळू येथे आपण व काही ग्रामस्थ गेलो. तेथून या घटनेबाबत वेंगुर्ले पोलीस ठाण्यात कळविले.

पोलीस आल्यावर त्यांच्या सोबत आम्ही नुतन गावडे हिच्या घरी गेलो. तेथे नुतन शंकर गावडे, तिचे वडील शंकर सखाराम गावडे व तिची आई पार्वती शंकर गावडे होते. त्यांना भाऊ सागर कोठे आहे? याबाबत विचारले मात्र त्यांनी आपणास माहित नाही असे सांगितले. त्यामुळे आम्ही सर्वांनी त्यांच्या कंम्पाउंडमध्ये शोध घेतला असता, सागर याचा मृतदेह कंपाउंडमध्ये विद्युत तारा लागलेल्या स्थितीत आढळून आला. त्यामुळे विदयुत तारांचा शॉक देवून त्यांनी सागर याला ठार मारले आहे, असे त्यांनी आपल्या तक्रारीत म्हटले आहे. या तक्रारीवरून पोलिसांनी गुन्हा दाखल केला असून त्या तिघांनाही ताब्यात घेतले आहे. अशी माहिती वेंगुर्ल्याचे पोलीस निरीक्षक संदीप भोसले यांनी दिली.

घटनास्थळी उपविभागीय पोलीस अधीक्षक घनश्याम आडाव यांनी भेट देऊन माहिती घेतली. यावेळी वेंगुर्ला पोलीस निरीक्षक संदीप भोसले या घटनेनंतर ओरोस येथील रासायनिक विश्लेषक टीमला पाचारण करण्यात आले. या टीममधील सहाय्यक पोलीस निरीक्षक प्रशांत मागाडे, हवालदार संतोष सावंत, पोलीस नाईक कमलेश सोनवणे यांनी मृतदेहाचा अधिक तपास करत घटनास्थळी मिळालेले विविध पुरावे वेंगुर्ला पोलिसांकडे सुपूर्द केले.