म्युच्युअल फंडाच्या नावाने मॅनेजरकडूनच खाते’सफाई’; २५-३० जणांच्या खात्यावर डल्ला, मुंबईतील प्रकार

मुंबई : बँकेचे नाव, प्रतिष्ठा जपण्यासाठी कर्मचारी-अधिकारी यांचा आटापिटा सुरू असतो. ग्राहकसंख्या वाढवणे, बँकेच्या वेगवेगळ्या योजनांमध्ये ग्राहकांना गुंतवणूक करण्यास प्रवृत्त करणे, असे प्रयत्न अधिकारी करीत असतात. मात्र, एका अग्रगण्य बँकेच्या नागपाडा शाखेतील मॅनेजरनेच खातेदारांची खाती रिकामी केल्याचा प्रकार समोर आला आहे.

काय आहे प्रकरण?

बँकेच्या योजनांमध्ये गुंतविण्यापेक्षा शेअर्समध्ये गुंतवणूक करण्याचा सल्ला देत या मॅनेजरने सुमारे ३० ते ३५ खातेदारांच्या खात्यांमधून लाखो रुपये परस्पर वळवले. नागपाडा पोलिसांनी मॅनेजर अझर हशमी याला अटक केली आहे. एका जरीकाम व्यावसायिकाचे एका नामांकित बँकेच्या नागपाडा येथील शाखेमध्ये अनेक वर्षांपासून खाते आहे. याच शाखेमध्ये अझर हा रिलेशनशिप मॅनेजर म्हणून काम करतो. बँकेच्या वतीने दिल्या जाणाऱ्या गुंतवणुकीच्या वेगवेगळ्या योजना खातेदारांना समजावून सांगण्याची जबाबदारी अझर याच्याकडे आहे. त्यानुसार जरीकाम व्यावसायिक बँकेत गेले असताना अझरने त्यांना बोलावले. बँक खात्याचा तपशील जाणून घेण्यासाठी त्याने व्यवसायिकाचा मोबाइल स्वतःकडे घेतला . बँकेच्या अॅपवरून अझर तपशील तपासत असताना व्यावसायिकाच्या खात्यावर लाखो रुपये असल्याचे दिसले. इतकी रक्कम बँकेत ठेवण्याऐवजी शेअरमध्ये गुंतविल्यास चांगला नफा होईल, असा सल्ला अझर याने व्यावसायिकाला दिला. चांगला परतावा मिळण्याच्या आमिषाने व्यावसायिकाने तयारी दर्शवली.
शेअर मार्केटमध्ये पैसे गुंतवताय? सावधान; नवी मुंबईत तब्बल १३ कोटींची फसवणूक, काय घडलं?
३०हून अधिक खातेदारांबाबतीत असाच प्रकार

अझर याने तब्बल २५ लाख रुपये व्यावसायिकाच्या खात्यामधून परस्पर वेगवेगळ्या खात्यांमध्ये वळते केले. काही महिन्यांनंतर व्यवसायिकाच्या खात्यावर पाच ते सहा हजार रुपये शिल्लक होते. बँकेत जाऊन त्यांनी चौकशी केली असता त्यांची रक्कम कोठेही गुंतवली गेली नसल्याचे दिसून आले. अझर हादेखील मोबाइल बंद करून गायब झाला होता. जरीकाम व्यावसायिकाबरोबरच अन्य सुमारे ३०हून अधिक खातेदारांबाबतीत असाच प्रकार घडला असल्याचे दिसून आले. व्यावसायिकाने तक्रार केल्यानंतर पोलिसांनी गुन्हा दाखल करून अझर याला शोधून बेड्या ठोकल्या. अझर याने काहींच्या खात्यावरून ऑनलाइन अर्जाद्वारे कर्जही घेतल्याचे उघड झाले आहे.