बदलापूर प्रकरणात नवा ट्विस्ट; अक्षय गतीमंद होता? आई म्हणते – तो लहाणपणीपासूनच…

ठाणे: बदलापूरमध्ये चिमुकल्या मुलींसोबत जी घटना घडली, त्याने संपूर्ण राज्यात संतापाची लाट उसळली आहे. बदलापुरात झालेल्या तीव्र आंदोलनानंतर याप्रकरणात तातडीने कारवाई करण्यात आली. याप्रकरणातील आरोपी अक्षय शिंदेला कोर्टाने २६ ऑगस्टपर्यंत पोलीस कोठडी सुनावली आहे. आता या प्रकरणात दररोज धक्कादायक माहिती समोर येत आहे. याबाबत अक्षयच्या कुटुंबीयांनी जी माहिती दिली आहे, त्याने या प्रकरणाला वेगळं वळण लागू शकतं.

अक्षय गतीमंद होता का?

अक्षय शिंदेच्या आईने याप्रकरणात अनेक महत्त्वाच्या गोष्टी उघड केल्या आहेत. एपीबी माझाशी बोलताना त्या म्हणाल्या की, अक्षय हा शाळेत फक्त बाथरुम धुवायचं काम करत होता. त्याव्यतिरिक्त त्याच्याकडे दुसरं कुठलंही काम नव्हतं. त्यानंतर, अक्षय शिंदे हा गतीमंद होता का असा प्रश्न त्यांना विचारण्यात आल्या. यावर उत्तर देताना त्या म्हणाल्या की, नाही तो गतीमंद नव्हता, पण त्याच्या छातीत दुखायचं. तो लहानपणीपासून डोक्याने कमजोर होता. त्याचं औषधंही सुरु होतं.
Badlapur School Case: अक्षय फक्त बाथरुम धुवायचा, उगाच अडकवलं, बदलापूर प्रकरणात आरोपीच्या आईवडिलांचा दावा

दोन आठवड्यापूर्वीच शाळेत कामाला लागलेला

अक्षय शिंदे हा दोन आठवड्यांपूर्वीच शाळेत कामाला लागला होता. १३ तारखेला शाळेत काहीतरी घडल्याचं समजलं. १७ ऑगस्टला पोलिसांनी अक्षयला अटक केली. याबाबत शाळेत काम करणाऱ्या एका बाईने मला सांगितलं. जेव्हा मी गेले तेव्हा पोलीस त्याला मारत होते. पोलीस अक्षयला पोलीस स्टेशनला घेऊन गेले. अक्षयने लहान मुलींवर अत्याचार केल्याचं आम्हाला सांगण्यात आलं. पण, अक्षयकडे फक्त बाथरुम साफ करण्याचं काम होतं. तो रोज सकाळी ११ वाजता शाळेत जायचा, आम्हीही शाळेत साफसफाईचं काम करतो. शाळा सुटल्यावर साडेपाचला शाळेत जातो आणि साडेआठला बाहेर येतो, असंही त्यांनी सांगितलं.

माझ्या मुलाला अडकवलं जात आहे – अक्षयचे वडील

तर, अक्षयच्या वडिलांनी सांगितलं की, जे सांगितलं जात आहे तसला काही प्रकार घडलाच नाही. माझ्या मुलाला याप्रकरणात अडकवलं जात आहे, असा दावा त्यांनी केला. त्यामुळे याप्रकणाला आता नवं वळण लागण्याची शक्यता आहे.