Agriculture Dry Port: ड्रायपोर्टला चाल? निफाडमधून ३१ लाख मेट्रिक टन मालवाहतूक, ‘एनपीजी’ची चर्चा

म. टा. प्रतिनिधी, नाशिक : केंद्र सरकारकडून नाशिकमध्ये मल्टिमॉडेल लॉजिस्टिक पार्क उभारण्याचे नियोजन असून, हा निफाडजवळच्या ड्रायपोर्ट प्रकल्पाचाच एक भाग आहे. सन २०२९ पासून या प्रकल्पातून दरवर्षी ३१ लाख मेट्रिक टन मालवाहतुकीचे उद्दिष्ट राहणार असल्याचे वृत्त आहे.

सात केंद्रीय मंत्रालयांच्या प्रतिनिधींचा समावेश असलेल्या ‘एनपीजी’ने (नेटवर्क प्लॅनिंग ग्रुप) या प्रकल्पाच्या विकासाविषयी गुरुवारी (दि. २२) वाणिज्य व उद्योग मंत्रालयाशी चर्चा केली. निफाड साखर कारखान्याच्या जागेत ड्रायपोर्ट उभारले जाणार असून, त्याच्या भूसंपादनाची प्रक्रिया सध्या सुरू आहे. १०८ एकर जागेवर उभारल्या जाणाऱ्या या ड्रायपोर्टमध्ये ट्रक टर्मिनस, वेअरहाऊस, कस्टम ऑफिस, कोल्ड स्टोअरेज, ओपन स्टोअरेज, प्रोसेसिंग एरिया, इंटर्नल कंटेनर डेपो आदी सुविधा उपलब्ध राहणार आहेत. शेतकरी व निर्यातदारांनी माल आणल्यानंतर तेथेच सर्व प्रक्रिया होणार आहे. त्यानंतर रेल्वेच्या मालगाड्यांद्वारे हा माल मुंबईला पाठवण्याचे नियोजन आहे. गेल्या काही दिवसांपासून या प्रकल्पाच्या एकूण प्रक्रियेला गती आली असली, तरी भूसंपादनाचे काम संथ सुरू असल्याच्या तक्रारी आहेत. त्यातच गुरुवारी नाशिकमध्ये मल्टिमॉडेल लॉजिस्टिक पार्कच्या उभारण्यासंदर्भात ‘एनपीजी’ने वाणिज्य व उद्योग मंत्रालयाशी चर्चा केल्याचे वृत्त आले. त्यामुळे हे दोन्ही प्रकल्प वेगवेगळे की एकच, याविषयी संभ्रम निर्माण झाला. मात्र, लॉजिस्टिक पार्क हा ड्रायपोर्टचाच भाग असल्याचे स्पष्ट झाले असून, त्याला निरनिराळ्या केंद्रीय मंत्रालयांकडून निधी वितरित केला जात असल्याचे समोर आले आहे. या प्रकल्पातून २०२९ पासून दरवर्षी ३१ लाख मेट्रिक टन मालवाहतुकीचे उद्दिष्ट आहे. म्हणजे हा प्रकल्प पूर्ण क्षमतेने कार्यान्वित होण्यास आणखी चार वर्षे लागणार असल्याचा अंदाज आहे.

खुशखबर…! मुंबईच्या किनारी नवे क्रूझ टर्मिनल;काय आहे खासियत?
निर्यात होणार सुकर

निफाड ड्रायपोर्ट प्रकल्प अनेक रस्त्यांशी व कसबेसुकेणे रेल्वेस्थानकाला जोडला जाणार असून, त्यासाठी स्वतंत्र रेल्वे ट्रॅक विकसित केला जाणार आहे. या प्रकल्पामुळे कांदे, द्राक्षे, डाळिंब, मका, प्रक्रियायुक्त कृषी उत्पादनांसह ऑटो पार्ट्स, औषधे, लोखंडी पाइप, इलेक्ट्रिक वस्तूंची कोट्यवधींची निर्यात सुकर होणार आहे.

मल्टिमॉडेल लॉजिस्टिक पार्क हा निफाड ड्रायपोर्टचाच भाग आहे. त्याला केंद्राच्या निरनिराळ्या मंत्रालयांकडून निधी दिला जात आहे. ड्रायपोर्टसाठी आवश्यक भूसंपादनाचे पैसे येऊनही हे काम संथ गतीने सुरू आहे. त्यामुळे ‘जेएनपीटी’च्या अध्यक्षांना भेटणार आहोत.- डॉ. प्रशांत पाटील, समन्वयक, भाजप वैद्यकीय आघाडी