सप्टेंबरमध्ये वर्क ऑर्डर निघाली, डिसेंबरमध्ये पुतळ्याची उभारणी; धक्कादायक माहिती उघडकीस

राज्य सरकारचं सार्वजनिक बांधकाम खातं आणि नौदल यांची पुतळा उभारणीत महत्त्वाची भूमिका होती. राजकोट परिसरात पुतळ्याची उभारणी करण्यात आली. त्यासाठीचा चौथरा सार्वजनिक बांधकाम विभागानं बांधला. त्यावर पुतळा उभारण्याची जबाबदारी नौदलाकडे होती. पुतळा उभारणी, निविदा प्रक्रिया राबवण्याचं काम नौदलाकडे होतं. पण यामध्ये अनेक त्रुटी असल्याचं आढळून आलं आहे.
Aaditya Thackeray vs Narayan Rane: वेगवेगळ्या वेळा ठरलेल्या, पण तरीही ठाकरे-राणे आमनेसामने; किल्ल्यावर नेमकं काय घडलं?
ज्या ठिकाणी पुतळा उभारण्यात आला, ती जागा सार्वजनिक बांधकाम विभागाच्या ताब्यात आहे. पुतळ्यासाठी एकूण २ कोटी ४० लाख रुपये रक्कम खर्च करण्यात आली. ही रक्कम सार्वजनिक बांधकाम विभागानं नौदलाकडे वर्ग केली. पुतळ्यासाठीचा चबुतरा सार्वजनिक बांधकाम विभागानं उभारला. त्यावर प्रत्यक्ष पुतळा बसवण्याची जबाबदारी नौदलानं पार पाडली.
राणे-ठाकरे समर्थक भिडले; जयंत पाटलांकडून मध्यस्थीचा प्रयत्न; पण एका मागणीनं परिस्थिती चिघळली
पुतळ्यासंदर्भात नौदलानं ८ सप्टेंबर २०२३ रोजी वर्क ऑर्डर काढली. ३५ फुटांचा पुतळा उभारण्यासाठी साधारणत: ३ वर्षांचा कालावधी लागतो. विशेष म्हणजे पुतळा साकारणाऱ्या जयदीप आपटेनं सनातन प्रभातकडे व्यक्त केलेल्या मनोगतामध्येही ३ वर्षांचा कालावधी आहे. जरा जरी चूक झाली, तरी सगळं संपेल, अशी भीती आपटेनं मनोगतात व्यक्त केली होती.

पुतळा उभारण्यासाठी ३ वर्षांचा कालावधी गरजेचा असताना प्रत्यक्षात आपटेनं ३ महिन्यांत पुतळा उभा केला. धक्कादायक बाब म्हणजे कला संचलनालयानं ६ फूट उंच पुतळा उभारण्यासाठी परवानगी दिलेली होती. पण प्रत्यक्षात मात्र नौदलानं ३५ फूट उंच पुतळ्यासाठी वर्क ऑर्डर काढली. त्यामुळे पुतळ्यासाठी राबवण्यात आलेल्या प्रक्रियेचा पायाच कच्चा असल्याचं समोर आलं आहे.