Mumbai Metro-3: मुंबईकरांसाठी खुशखबर! सीएमआरएस नोंदणीसाठी मेट्रो-३ सज्ज, भुयारी सफरीसाठी राहा तयार

‘कुलाबा-वांद्रे-सीप्झ’ म्हणून ओळखली जाणारी आरे ते कफ परेड ३३ किमी लांबीची व २७ स्थानकांची मेट्रो-३ ही राज्यातील सर्वाधिक लांबीची भूमिगत मेट्रो मार्गिका आहे. मार्गिकेच्या आरे ते बीकेसी या १० स्थानकांच्या पहिल्या टप्प्याला सुरुवातीला आरे कारशेडमधील झाडासंबंधीचे आंदोलन व अन्य प्रकरणांमुळे दोन वर्षांचा विलंब झाला. त्यानंतर ही मार्गिका डिसेंबर २०२३मध्ये सुरू होईल, अशी घोषणा मुख्यमंत्री एकनाथ शिंदे यांनी केली होती. मात्र ती फोल ठरली. त्यानंतर एप्रिल २०२४मध्ये या मार्गिकेचा पहिला सुरू होणार होता. मात्र त्यासही विलंब झाला. पुढे जुलैअखेर हा पहिला टप्पा सुरू करण्याचे ही मार्गिका उभी करणाऱ्या मुंबई मेट्रो रेल कॉर्पोरेशनचे (एमएमआरसी) प्रयत्न होते. मात्र ‘सीएमआरएस’ प्रमाणपत्र प्राप्त करण्याच्या प्रक्रियेस सातत्याने विलंब झाला. आता मात्र त्याबाबतची प्रक्रिया सुरू झाल्याची माहिती ही मार्गिका उभी करणाऱ्या मुंबई मेट्रो रेल कॉर्पोरेशनमधील (एमएमआरसी) सूत्रांनी दिली.
Mumbai Metro: मिरा-भाईंदरकरांसाठी Good News! मेट्रो ९ यावर्षीच धावणार, अशी असतील स्थानके
मेट्रो मार्गिका सुरू करण्याआधी उभ्या केलेल्या यंत्रणांसह विविध प्रणालींची ‘रेल्वे आरेखन व मानके संघटने’कडून (आरडीएसओ) तपासणी होते. ‘आरडीएसओ’कडून हिरवा कंदील मिळाल्यानंतर मार्गिका व्यावसायिकदृष्ट्या (प्रवाशांसाठी) सुरू करण्याआधी ‘मेट्रो रेल सुरक्षा आयुक्तां’च्या (सीएमआरएस) प्रमाणपत्राची गरज असते. त्यासाठी एमएमआरसीने ‘सीएमआरएस’ना निरीक्षणासाठी निमंत्रित करणे आवश्यक असते. मागील आठवड्यापर्यंत एमएमआरसीकडून यासाठी तयारीच झालेली नव्हती. मात्र आता यासाठीची तयारी जोमाने सुरू असून ‘सीएमआरएस’ना निमंत्रित करण्यासाठी लवकरच अर्ज केला जाणार असल्याची माहिती विश्वसनीय सूत्रांनी ‘महाराष्ट्र टाइम्स’ ला दिली.