Heritage Sites In Pune: ऐतिहासिक ठिकाणांना ‘हेरिटेज लूक’; पुणे महानगरपालिकेने खासगी कंपन्यांकडून मागविले प्रस्ताव

पुणे महापालिकेने या प्रकल्पाबाबत खासगी कंपन्यांकडून प्रस्ताव (रिक्वेस्ट फॉर प्रपोझल) मागितले असून, तीन कंपन्यांकडून प्रस्ताव सादर झाले आहेत. या प्रस्तावांची छानणी झाल्यानंतर त्याबाबतचा पुढील निर्णय घेतला जाणार असल्याची माहिती महापालिकेचे वाहतूक नियोजनकार निखिल मिजार यांनी सांगितले. पुणे शहराचा ऐतिहासीक वारसा मोठा आहे. शिवराय आणि राजमाता जिजाऊंनी सोन्याच्या नांगर फिरवलेल्या पुण्यनगरीतून पेशवाईत देशाची सूत्रे फिरवली जात होती. हा सर्व काळ पुन्हा एकदा पुणेकरांना अनुभवता यावा यासाठी टिळक चौक (अलका चौक) ते क्वार्टर गेट चौक, सिमला ऑफिस चौक, शनिवारवाडा, कसबा गणपती, लाल महाल, नाना वाडा, श्रीमंत दगडूशेठ गणपती मंदिर, मंडई, तुळशीबाग आणि विश्रामबागवाडा या परिसराला ‘हेरिटेज लूक’ देण्याचा महापालिकेचा प्रयत्न आहे.

कितने आदमी थे?… हाऊसफुल्ल, सरदार! अर्धशतकानंतरही ‘शोले’साठी मुंबईत चित्रपटगृह तुडुंब
अत्यंत वर्दळीच्या असलेल्या या परिसराला हेरिटेज लूक देताना नागरिकांना पायी चालणे सुलभ व्हावे, या दृष्टीने रस्ते, पदपथ तयार करण्यात येणार आहे. याशिवाय या ठिकाणी सार्वजनिक वाहतूक सक्षम करण्यासाठी प्रयत्न करण्यात येणार आहे. या परिसरात असलेले हॉकर्स, होर्डिंग्ज, दुकानांवरील पाट्या या सगळ्यांना विशिष्ट ‘थीम’मध्ये करण्याचा प्रस्ताव आहे त्यासाठी हे काम देण्यात येणाऱ्या कंपनीने या सर्व परिसराचे छोट्या-मोठ्या दुकांनासह सर्वेक्षण करणे अपेक्षित असल्याचे प्रस्तावात नमूद करण्यात आले आहे. प्रस्ताव सादर करणाऱ्या कंपन्यांनी देशभरात अशा प्रकारे विकास करण्यात आलेल्या तीन ‘हेरिटेज साईट’चा ‘केस स्टडी’ सादर करणे बंधनकारक केले आहे. यामुळे महापालिका प्रशासनास या सर्व परिसराचा विकास करताना अपेक्षित बदलांचा अंदाज साधता येणार आहे.

महापालिका प्रशासनाने शहराच्या मध्यवर्ती भागाला ‘हेरिटेज लूक’ देण्यासाठी प्रस्ताव मागवले होते. प्रशासनास तीन प्रस्ताव सादर झाले असून, त्यावर पुढील निर्णय घेण्यात येणार आहेत.– निखिल मिजार, वाहतूक नियोजन अधिकारी