मराठवाड्यातील शेतकऱ्यांच्या अश्रूंवर मायेची फुंकर; जास्तीत जास्त नुकसानभरपाई देण्याची मुख्यमंत्र्यांची ग्वाही

लातूर जिल्ह्यात २ सप्टेंबर रोजी ३२ महसूल मंडळांत अतिवृष्टी झाली. या अतिवृष्टीने झालेल्या नुकसानीची पाहणी करण्यासाठी शिंदे आणि फडणवीस थेट शेतकऱ्यांच्या बांधावर पोहोचले. या वेळी त्यांनी उदगीर तालुक्यातील हेर आणि लोहारा शिवारातील पीकहानीची पाहणी केली; तसेच शेतकऱ्यांकडूनही माहिती घेतली. उदगीर, जळकोट तालुक्यातील सर्व महसूल मंडळांत अतिवृष्टी झाल्याने सोयाबीन आणि इतर पिकांचे मोठ्या प्रमाणात नुकसान झाले आहे. त्यामुळे शिंदे आणि फडणवीस यांनी शेतकऱ्यांशी संवाद साधून त्यांना तातडीने नुकसान भरपाईबाबत आश्वस्त केले.
Eknath Shinde On Elections: महाराष्ट्रात विधानसभा निवडणूका कधी? मुख्यमंत्री एकनाथ शिंदे यांनी दिले मोठे संकेत
मराठवाड्यात अतिवृष्टी झाल्यानंतर लगेचच विभागीय आयुक्त आणि जिल्हाधिकाऱ्यांना तातडीने पंचनामे करण्याच्या सूचना दिल्या आहेत. लातूर जिल्ह्यातही अतिवृष्टीने सोयाबीनसह इतर पिकांचे मोठ्या प्रमाणात नुकसान झाल्याचे आज प्रत्यक्ष पाहणीमध्ये दिसून आले.

सोयाबीन पिकामध्ये अजूनही पाणी साचलेले दिसत आहे. यामुळे झालेल्या हानीचे पंचनामे युद्धपातळीवर करून शेतकऱ्यांना लवकरात लवकर मदत देण्यात येईल, असे आश्वासन सरकारच्या वतीने देण्यात आले. या वेळी केंद्रीय सामाजिक न्याय राज्यमंत्री रामदास आठवले, राज्याचे क्रीडा आणि युवक कल्याणमंत्री संजय बनसोडे यांच्यासह माजी आमदार गोविंद केंद्रे, जिल्हा परिषदेचे मुख्य कार्यकारी अधिकारी अनमोल सागर, उदगीरचे उपविभागीय अधिकारी सुशांत शिंदे, तहसीलदार राम बोरगावकर उपस्थित होते.
ST Bus Strike : भक्तांचे विघ्न बाप्पाने दूर केले! एसटी कर्मचाऱ्यांचा संप मागे, एसटी बससेवा पूर्ववत

अतिवृष्टीग्रस्त शेतकऱ्यांना मदत करा – राज ठाकरे

मराठवाड्यात गेल्या काही दिवसांपासून सुरू असलेल्या पावसामुळे शेतकऱ्यांचे प्रचंड नुकसान झाले असून, शेतकऱ्यांना त्वरित मदत जाहीर करण्याची मागणी महाराष्ट्र नवनिर्माण सेनेचे अध्यक्ष राज ठाकरे यांनी राज्य सरकारकडे केली आहे.

या अतिवृष्टीमुळे शेतीचे अमाप नुकसान झाले आहे. कित्येक पिके अगदी काढणीला आलेली असताना वाहून गेली आहेत. डोळ्यासमोर उभी राहिलेली पीके नष्ट होणे आणि ते देखील सणासुदीच्या तोंडावर, हे सहन करणे कठीण आहे. राज्य सरकारने तातडीने या नुकसानीचे पंचनामे करून, जितक्या लवकर नुकसान भरपाईची रक्कम देता येईल ते पाहावे. शेतकरीही लाडका आहे हे दाखवून द्यावे, असे राज यांनी समाजमाध्यमांवर म्हटले आहे.

मराठवाड्यातील मनसेच्या कार्यकर्त्यांनीही प्रशासनाकडून नुकसानीचे पंचनामे झटपट होत असल्याचे पाहावे व नसल्यास ते करायला लावून शेतकऱ्यांना नुकसान भरपाई मिळेल हे पाहावे, अशी सूचनाही राज यांनी या पोस्टद्वारे केली. पावसाच्या पाण्याने जमीन ओली झालेली असते, आणि ती सुकायला वेळ लागतो, यामुळे लहान मुलांपासून ते म्हाताऱ्या माणसांपर्यंत सर्वच जण आजारी पडतात. त्यामुळे ज्या घरांत पाणी शिरले आहे अशा ठिकाणी प्लास्टिकच्या शीट्स पोहचतील किंवा जुने फ्लेक्स तरी पोहोचतील हे बघावे, किमान त्या निमित्ताने तरी पुढारी जनतेच्या घरात पोहोचतील आणि आजपर्यंत आपले वाटोळे कोणी केले तेही जनतेला समजेल, असा टोलाही त्यांनी यात लगावला आहे.