३० लाखांमुळे सहकाऱ्यानेच कांड केला, महिलेची कारमध्ये हत्या, मोठी अपडेट समोर

नाशिक येथे मुलाकडे राहत असलेल्या निवृत्त परिचारिका स्नेहलता चुंबळे २० ऑगस्ट रोजी या जळगावला सोसायटीच्या सभेला आल्यानंतर बेपत्ता होत्या. त्यांची २२ ऑगस्ट रोजी तालुका पोलीस ठाण्यात हरवल्याची नोंद करण्यात आली. या प्रकरणाचा तपास करत असताना ३० लाखांसाठी हत्या करणारा जिल्हा परिषद आरोग्य विभागातील कनिष्ठ लिपिक जिजाबराव पाटील आणि जिल्हा परिषद बांधकाम विभागातील लिपिक विजय निकम यांनी रचलेला कट समोर आला आहे. दरम्यान, मृत महिलेचा मृतदेह अद्याप सापडलेला नाहीय.

निवृत्त परिचारिकेसोबत आपण आहे हे कुणाला समजू नये म्हणून दोघांनी महामार्गावरून जाताना टोल नाकाही चुकवला. त्यानंतर अमळनेर तालुक्यातील आर्वी मार्गे ते शिरपूरकडे गेले. मात्र, ते सीसीटीव्ही फुटेजमध्ये ते कैद होत गेले. पोलिसांनी तोच धागा पकडत त्यांना पकडलं. ही हत्या जिजाबराव पाटील याच्या कारमध्ये करण्यात आल्याने ती गाडी जप्त होऊ नये म्हणून पाटील याने दुसरे जुने वाहन दाखविण्याचाही प्रयत्न केला. मात्र पोलिसांसमोर त्याचा प्लॅन फसला.

सहानुभूती मिळावी म्हणून पायाला पाटा

जिजाबराव पाटील आणि विजय निकम यांना तालुका पोलिसांनी चौकशीनंतर सोडल्यावर त्यांना एलसीबीकडून चौकशीसाठी बोलवण्यात आले होते. पोलिसांकडून सहानुभूती मिळावी म्हणून विजय निकम याने अमळनेर येथील राहत्या डॉक्टरला तीन हजार रुपये देऊन पायाला फॅक्चर नसताना पाटा बांधून घेतला होता.