शिंदेंमुळे संघ चिंतेत, भाजपची विचित्र गोची; विधानसभेच्या तोंडावर डोकेदुखी का वाढली?

भाजपचे वरिष्ठ नेते आणि संघाचे प्रमुख पदाधिकारी यांची भेट मुंबईत नुकतीच झाली. त्यात सर्वाधिक चर्चा शिवसेनेच्या फुटीबद्दल झाली. शिवसेनेत फूट पाडून चूक केली नाही ना, याबद्दल बैठकीत बराच खल झाला. दोन वर्षांपूर्वी मुख्यमंत्री झालेल्या एकनाथ शिंदेंची ताकद चांगलीच वाढली आहे. राज्यासह केंद्रातही त्यांनी चांगला जम बसवला आहे. याबद्दल संघातील काही गटांनी चिंता व्यक्त केली. उद्धव ठाकरेंचा प्रभाव संपवण्यासाठी शिवसेना फोडण्यात आली. पण यातून भाजपनं शिंदेंच्या रुपात नवी समस्या निर्माण केली आहे का, यावर बैठकीत चर्चा झाल्याचं कळतं.
Ajit Pawar: बारामतीला एकदा माझ्याशिवाय दुसरा आमदार मिळायला हवा, मग तुम्हाला…; दादांकडून कोणते संकेत?
जुलैच्या शेवटचा आठवड्यात आणि ऑगस्टच्या पहिल्या आठवड्यात राष्ट्रवादी काँग्रेस शरदचंद्र पवार गटाचे अध्यक्ष शरद पवार मुख्यमंत्री एकनाथ शिंदेंच्या भेटीला गेले होते. १० दिवसांत पवार-शिंदेंच्या दोन भेटी झाल्या. या भेटींमुळे भाजपच्या गोटात अस्वस्थता आहे. लोकसभा निवडणुकीत शिंदेंचा स्ट्राईक रेट भाजपपेक्षा उत्तम राहिलेला आहे. भाजप आणि शिंदेंच्या खासदारांच्या संख्येत फारसा फरक नाही. शिंदेंनी अतिशय कमी वेळात स्वत:ची स्थिती बळकट केली आहे. त्याची चिंता आता भाजपसह संघाला वाटू लागली आहे.
BJP Mission for Vidhan Sabha: भाजपने ‘निम्म्याहून जास्त’ जागांचा हट्ट सोडला, विधानसभेला नवे मिशन, खात्री फक्त ५० चीच
लोकसभेच्या जागावाटपात भाजपनं शिंदेसेनेवर दबावतंत्राचा वापर केला. शिंदेंना जागावाटपात बराच संघर्ष करावा लागला. त्यांनी १५ जागा पदरात पाडून घेतल्या. त्यातील ७ जागा निवडूनही आणल्या. छत्रपती संभाजीनगरची जागा निवडून आणत त्यांनी मराठवाड्यात महायुतीत मिळू शकलेला व्हाईटवॉश टाळला. मराठा आरक्षणासाठी आंदोलन करत असलेल्या मनोज जरांगे पाटील यांच्याशी सलोख्याचे संबंध राखण्याचं काम शिंदेंनी केलं आहे. शिंदे गटातील मंत्री जरांगेंशी संवाद ठेवून आहेत. त्यामुळे शिंदेंनी जरांगे पाटील आणि आरक्षणाचा विषय खुबीनं हाताळला आहे. पण आरक्षणामुळे सर्वाधिक डॅमेज भाजप झाला आहे.

एकीकडे भाजप आणि अजित पवार गटाविरोधात शरद पवार त्वेषानं लढत आहेत. पण पवारांनी शिंदेंना अप्रत्यक्षपणे पास दिला आहे. पवार-शिंदेंच्या भेटी मध्यंतरी चर्चेचा विषय ठरल्या. शरद पवार गट विशेषत: भाजप आणि अजित पवारांना लक्ष्य करत आहेत. सध्याच्या घडीला त्यांनी अनेक ठिकाणी भाजपचे मोहरे गळाला लावण्यास सुरुवात केली आहे. अजित पवारांचे अनेक आमदारही पवारांशी संपर्क ठेवून आहेत. पण शरद पवार शिंदेसेनेला जास्त डॅमेज करताना दिसत नाहीत. उलट शिंदे-पवारांचं कॉम्बिनेशन महायुतीत भाजप, अजित पवार गटाचं टेन्शन वाढवत आहे. तर महाविकास आघाडीत ठाकरेसेनेला अस्वस्थ करत आहे. शिंदेंचं हे राजकारण भाजपसाठी चिंतेचा विषय ठरत आहे.