पत्नीचा मृतदेह पाहून पतीने जागीच सोडले प्राण; गणेशोत्सवासाठी कोकणात गेलेले हडकर कुटुंब हादरले

काळाचा हडकर कुटुंबावर घाला..

मुंबई शिवडी गिरीराज सोसायटी परिसरात राहणारे विपीन हडकर दरवर्षीप्रमाणे यंदाही आनंदाने गावी गणपतीला आले होते. विपीन हडकर यांच्यासोबत पत्नी त्यांची आई आणि बहिणीची मुले म्हणजेच भाचे गावी आले होते. विपिन यांची पत्नी उषा घराशेजारी असलेल्या सेप्टिक टँकचे झाकण साफ करताना त्यांचा तोल जाऊन सेप्टिक मध्ये पडल्या, त्याचवेळी त्यांचा दुर्दैवी मृत्यू झाला होता. याच दरम्यान पती विपिन हे काही कामानिमित्त बाहेर गेले होते मात्र त्यांना घरी माघारी आल्यावर पत्नी घरात कुठेही दिसली नाही. त्यांनी जवळच्या नातेवाईकांकडे चौकशी केली. मात्र याच दरम्यान त्यांना सेप्टिक टँकचे झाकण उघडे दिसले आणि त्यांना पत्नीचा मृतदेह टाकीत दिसला. हा सगळा धक्कादायक प्रकार पाहून विपिन यांच्या पायाखालची जमीन सरकली त्यांना मोठा धक्का बसला. आपल्या पत्नीचा झालेला मृत्यू पाहून विपिन यांनाही हृदयविकाराचा तीव्र झटका आला. यातच विपीन यांचाही जागीच मृत्यू झाला. हा सगळा प्रकार घरात असलेल्या विपीन यांच्या वृद्ध आईला कळताच त्यांनी ग्रामस्थांच्या मदतीने पोलिसांना माहिती दिली. दोन्ही मृतदेह जवळच्या ग्रामीण रुग्णालयात नेण्यात आले. पुढील सोपस्कार केल्यानंतर मृतदेह नातेवाईकांच्या ताब्यात देण्यात आले. या सगळ्या दुर्दैवी घटनेची नोंद मालवण पोलीस ठाण्यात घेण्यात आली आहे.
आधी धाकटा लेक गेला, मग मोठ्या मुलाची पुण्यात आत्महत्या, मायबापाने आठ दिवसातच मृत्यूला कवटाळलं, दोन चिठ्ठ्या सापडल्या

हडकर कुटुंबांच्या गणेशोत्सवाला लागले गालबोट

हडकर कुटुंब नोकरी निमित्त गेले कित्येक वर्षे मुंबई येथे स्थायिक होते. मुंबई शिवडी परिसरात राहणारे विपिन हे अपना बाजार येथे नोकरी करत होते. तर त्यांच्या पत्नी उषा गृहिणी होत्या. मुंबईत कायमस्वरूपी स्थायिक असलेले हडकर कुटुंब गणेशोत्सवासाठी गावी न चुकता येत असत. विपिन यांना एक मुलगा असून तो शिक्षणानिमित्त मुंबई येथे असल्याने तो गावी गणपतीला येऊ शकला नाही. हडकर कुटुंबातील पती व पत्नी यांचा एकाच वेळी मृत्यू झाल्याने या कुटुंबावर दुःखाचा मोठा डोंगर कोसळला आहे.

१९ वर्षीय मुलाच्या डोक्यावरचे छत्र हरपले

विपिन हडकर यांच्या मुलावरही एकाच वेळेला आपल्या आई वडिलांना गमावल्याचे मोठे दु:ख कोसळले आहे. विपिन यांचा १९ वर्षीय मुलगा अर्थव हा शिक्षण घेत असून त्याची परीक्षा असल्याने गावी आला नव्हता. अथर्व परीक्षेचा पेपर देऊन ५ सप्टेंबर रोजी गावी येण्यास रात्रीच्या ट्रेनने निघाला होता. मात्र त्याचदिवशी ही घटना घडल्याने त्याला पनवेल येथेच थांबण्यास सांगून ग्रामस्थांनी मुंबई येथे नेले. तेव्हा अथर्वची आई वडील जाताना झालेली प्रत्यक्ष भेट ही अखेरची भेट ठरली. निष्ठूर नियतीने डाव साधला आणि आई वडिलांचे छत्र हिरावून नेले. विपिन हडकर आणि उषा हडकर दोघांवरही मुंबई येथे शुक्रवारी ६ सप्टेंबर रोजी अंत्यसंस्कार करण्यात आले. सगळ्यात मन सुन्न करणाऱ्या घटनेने मालवण मसुरे ,कावे परिसरात शोककळा पसरली आहे. ग्रामस्थांकडूनही हळहळ व्यक्त केली जात आहे. या हडकर दाम्पत्याच्या मृत्यू पश्च्यात विपिन यांची आई, मुलगा अथर्व, विवाहित बहीण असा मोठा परिवार आहे.