पहिल्या तीन दिवसांत बक्कळ कमाई, चौथ्या दिवशी कमाईत घट? ‘धर्मवीर २’नं आतापर्यंत किती कोटींचा गल्ला जमवला?

मुंबई: शिवसेनेचे दिवंगत नेते, ठाणे जिल्हाप्रमुख आनंद दिघे यांच्या आयुष्यावर आधारित ‘धर्मवीर : मुक्काम पोस्ट ठाणे’ चित्रपटाला प्रेक्षकांचा चांगला प्रतिसाद मिळाला होता. त्यानंतर आता या चित्रपटाचा पुढील भाग ‘धर्मवीर २: साहेबांच्या हिंदुत्त्वाची गोष्ट’ नावानं प्रेक्षकांच्या भेटीला आला. पहिल्याच दिवशी या चित्रपटानं रेकॉर्डब्रेक कामगिरी करून तब्बल एक कोटींच्यावर बॉक्स ऑफिसवर केलं कलेक्शन असून २०२४ या वर्षात पहिल्या दिवशी सर्वाधिक कमाई करणारा मराठी चित्रपट ठरला आहे. मराठी चित्रपटांनी दाक्षिणात्य आणि बॉलिवूडमधल्या लोकप्रिय कलाकारांचा समावेश असणाऱ्या ‘देवरा पार्ट १’सारख्या चित्रपटाला या चित्रपटानं जोरदार टक्कर दिल्याचं बॉक्स ऑफिसवर दिसून येत आहे. पण चौथ्या दिवशी सिनेमाच्या कमाईत घट झाल्याचं दिसून आलं.
नोकरीच्या शोधात असताना महाराष्ट्रीय हॉटेलमध्ये जेवायचे अमिताभ बच्चन, तिथला हा गोड पदार्थ आजही आहे आवडीचा

वीकएंडपर्यंत या चित्रपटानं तब्बल सात कोटी ९५ लाखांच्या जवळपास कमाई करून दमदार कामगिरी केली आहे. १५०० पेक्षाही अधिक शोजनं या चित्रपटाची सुरुवात करण्यात आली.

‘धर्मवीर’ या चित्रपटानंतर ‘धर्मवीर २’ या चित्रपटात नक्की काय दाखवलं जाणार याची प्रेक्षकांना उत्सुकता होती. त्याचं प्रतिबिंब चित्रपटाला बॉक्स ऑफिसवर मिळालेल्या प्रेक्षकांच्या प्रतिसादातून दिसून येत आहे.

‘धर्मवीर २’ची घोषणा झाल्यापासूनच चित्रपटाविषयी उत्सुकता होती; त्यामुळंच ‘धर्मवीर’ या पहिल्या भागापेक्षा ‘धर्मवीर २’ या चित्रपटाला रसिकप्रेक्षकांचा मोठा प्रतिसाद मिळत आहे. प्रेक्षकांचा उदंड प्रतिसाद लाभत असलेला ‘धर्मवीर २’ हा पहिला राजकीय सीक्वेल ठरला आहे.

गोविंदा यांच्या पायाला गोळी लागली, लायसन्स रिव्हॉल्व्हर घेऊन सकाळी काय करत होते अभिनेते? मॅनेजरने दिली माहिती
sacnilk च्या आकड्यांनुसार पहिल्या दिवशी चित्रपटानं १.७५ कोटींची कमाई केली होती. त्यानंतर दुसऱ्या दिवशी सिनेमाच्या कमाईत मोठी वाढ झाली. सिनेमानं २.३५ कोटींचा गल्ला जमवला. तर तिसऱ्या दिवशी सिनेमानं २.७५ कोटींची कमाई केली. तर सोमवारी म्हणजेच चौथ्या दिवशी सिनेमाच्या कमाईत घट झाल्याचं पाहायला मिळालं. सिनेमानं १.१० कोटींची कमाई केली. या सिनेमानं आतापर्यंत सात कोटी ९५ लाखांच्या जवळपास कमाई केली आहे.

विशेष म्हणजे या चित्रपटाला महिलावर्गाचा प्रतिसाद मोठा मिळताना दिसतोय. केवळ मुंबई, ठाणे, पालघर नाही, तर पुणे, कोल्हापूर, इचलकरंजी, नाशिक, छत्रपती संभाजीनगर, मराठवाडा असा संपूर्ण महाराष्ट्रात चित्रपटला उत्तम प्रतिसाद मिळत आहे. येत्या काही दिवसांत चित्रपटाच्या कलेक्शनमध्ये आणखी वाढ होण्याची शक्यता वर्तवण्यात येत आहे.