Astro Upay For Navratri Ashtami 2024 : महाअष्टमीला करा हे खास उपाय! नात्यातील अडचणी होतील दूर, पती-पत्नीतला दूरावा संपेल

नवरात्रीच्या आठव्या माळेला महाष्टमी किंवा अष्टमी असे म्हटले जाते. या दिवशी दुर्गा देवीच्या आठव्या रुपाची पूजा केली जाते. या दिवशी उपवासासह कन्या पूजन देखील केले जातात. ही तिथी प्रामुख्याने विवाहित महिलांसाठी खास असते. या दिवशी देवीची उपासना करण्यासह शृंगार देखील अर्पण केला जातो. ज्यामुळे वैवाहिक जीवन सुरळीत होते असे म्हटले जाते. देवीची साज शृंगारासह पूजा केल्याने नात्यातील अडचणी कमी होतात. जोडीदारासोबतचे नाते अधिक दृढ होते.

नवरात्रीच्या महाष्टमी तिथीला महागौरीच्या पूजेला विशेष महत्त्व आहे. महागौरी ही शांती, पवित्रता आणि सुखी वैवाहिक जीवनाचा आशीर्वाद देते. देवीचे स्मरण केल्याने वैवाहिक नात्यात गोडवा येतो. नात्यातील तणाव दूर होतो असे म्हटले जाते.

अष्टमीच्या दिवशी दुर्गादेवीला शेंदूर अर्पण करा, ज्यामुळे वैवाहिक जीवनात सुख- शांती लाभते. महागौरीच्या चरणाजवळ शेंदूर अर्पण करुन विवाहित महिला आपल्या वैवाहिक जीवनात प्रेम आणि समजूतदारपणा वाढवू शकतात. तसेच यामुळे नात्यातील मतभेद दूर होतील.

अष्टमी तिथीला देवी महागौरीच्या पूजेला विशेष महत्त्व आहे. या दिवशी देवीला पांढरी मिठाई अर्पण करणे महत्त्वाचे मानले जाते. पांढरी मिठाई ही शुद्धता आणि शांततेचे प्रतीक आहे. महागौरीला पांढरा रंग अतिशय प्रिय मानला जातो. त्यामुळे मोठ्या भक्तीभावाने पांढऱ्या वस्तू अर्पण केल्याने वैवाहिक नाते सुधारते. नात्यात प्रेम टिकून राहाते.