काँग्रेस वाढवण्यासाठी आयुष्य वेचलं, त्याच्या लेकालाच पक्षातून काढलं; सहा वर्षांसाठी निलंबन

कोणाकोणाचं निलंबन?

रामटेक विधानसभा मतदारसंघातील राजेंद्र मुळक, काटोलमधील याज्ञवल्क्य जिचकार, पर्वती येथून आबा बागुल, कसबा पेठेतून कमल व्यवहारे, सांगलीतील जयश्री पाटील यांना सहा वर्षांसाठी पक्षाने निलंबित केले आहे.

जयश्री पाटलांवर कारवाई

काँग्रेसने पृथ्वीराज पाटील यांना उमेदवारी दिल्यानंतर नाराज झालेल्या वसंतदादा गटाने सांगली विधानसभेतून जयश्री पाटील यांना अपक्ष रिंगणात उतरवले होते. त्यांना खासदार विशाल पाटील यांनीही पाठिंबा जाहीर केला होता.

जिचकरांच्या लेकालाही बाहेरचा रस्ता

श्रीकांत जिचकार हे वयाच्या २६ व्या वर्षी आमदारकी मिळवत देशात सर्वात कमी वयात विधानसभा आमदार झाले होते. भारतातील सर्वाधिक पदव्या प्राप्त केलेले नेते अशी त्यांची ओळख होती. महाविकास आघाडीच्या जागावाटपात राष्ट्रवादी काँग्रेस (शरदचंद्र पवार) पक्षाकडे काटोल मतदारसंघ गेला. सुरुवातीला माजी गृहमंत्री अनिल देशमुख यांचे नाव असताना, त्यांनी माघार घेतली. त्यानंतर त्यांचे सुपुत्र सलील देशमुख यांना उमेदवारी देण्यात आली. त्यामुळे युवक काँग्रेसचे नेते याज्ञवल्क्य जिचकार यांनी उमदेवारी अर्ज भरण्याचा निर्णय घेत बंडखोरी केली.

आबा बागुल यांचीही हकालपट्टी

राज्यात महाविकास आघाडीचीच सत्ता येणार आणि मंचावरचे काही जण मंत्री होणार, असं खासदार सुप्रिया सुळे काही महिन्यांपूर्वी म्हणाल्या होत्या. त्यामुळे आबा बागूल यांची कळी खुलली होती. पर्वती विधानसभा मतदारसंघ यंदा काँग्रेसला सुटण्याची आशा निर्माण झाली होती. परंतु तसे न झाल्याने बागुल यांनी बंडखोरी केली होती.