आमच्याशी लढा, घरातील महिलांवर आरोप नकोत, सुप्रिया सुळे फडणवीसांवर भडकल्या

या पुस्तकात अनेक गोष्टी आहेत. मला दु:ख एकाच गोष्टीचं झालं. यात पुरुषांचा उल्लेख झाला, पण त्यात महिलांचाही उल्लेख झाला. अदृश्य शक्ती ही फक्त पुरुषांच्याच नाही तर महिलांच्याही मागे आहे. याचं सगळ्यात मोठं उदाहरण म्हणजे माझ्या तीन बहिणींवर आयटीची रेड. पाच दिवस ही रेड चालली. रजनी इंदुलकर, मीता पाटील आणि विजया पाटील या तिघींच्या घरी रेड टाकली.

छगन भुजबळ, संजय राऊत, नबाव मलिक, अनिल देशमुख यांचे कुटुंब कशातून गेले हे मला माहिती आहे. मला फडणवीसांना विचारायचं आहे की, जेव्हा आर आर पाटलांवर आरोप झाले त्या फाइलवरील फायनल इन्क्वायरी कोणी लावली. तर ती फडणवीसांनीच लावली. त्यांची मुख्यमंत्री म्हणून सही आहे. त्याच केसमध्ये, त्याच फाइलवर ज्यांच्या विरोधात फडणवीस होते, त्या अजित पवारांना बोलावून ती फाइल दाखवली. हा गुन्हा आहे, त्यांच्यावर खटला भरला पाहिजे. त्यांनी राज्याला फसवलं आहे.

फडणवीसांनी मुख्यमंत्री असताना ज्यांच्यावर आरोप केले. ज्यांच्यावर चौकशी सुरु केली, मुख्यमंत्री असताना चौकशी सुरु केली. मग त्यांना घरी बोलावून घेतलं. एकतर फाइल घरी आणली कशी, आणली तर ज्यांच्यावर आरोप केले त्यांना दाखवली कशी याची उत्तरं फडणवीसांना द्यावं लागेल.

या पुस्तकात सुनेत्रा पवारांचंही नाव आहे. यात सुनेत्रा पवारांचं नाव आणायची काय गरज होती. यात महिलांना का आणताय. तुमची लढाई राजकीय आहे तर आमच्याशी लढा आमच्या घरातील महिलांवर का आरोप करताय. आमच्या घरातल्या महिलांवर हल्ले करताय, असं म्हणत सुप्रिया सुळे चांगल्याच संतापलेल्या दिसल्या.