कवटी-धड गायब, कमरेखालील भाग शिल्लक, पुण्यात कुत्र्यांनी खाल्लेला अर्धवट मृतदेह सापडला

येरवडा परिसरात झाडाझुडुपात आढळला मृतदेह, परिसरात एकच खळबळ

येरवडा परिसरातील न्याती बिल्डिंगच्या समोरील झाडाझुडुपाच एक अत्यंत छिन्नविछिन्न परिस्थितीतील मृतदेह आढळून आला. या मृतदेहाची परिस्थिती अत्यंत वाईट आबे. त्याच्या कमरेच्या खालील थोडाच भाग शिल्लक आहे. तर, मृतदेहाच्या वरील भाग कुत्र्यांनी पूर्णपणे खाल्ला आहे. हा मृतदेह सडलेला असल्याची माहिती आहे.
UP News: मस्करीची कुस्करी! लहान मुलगा तुझाच; वहिनी सतत चिडवायची, दीर संतापला अन् एका रात्री भयंकर घडलं

गुरुवारी पोलिसांना माहिती मिळाली, मृतदेह पोलिसांच्या ताब्यात

पोलीस नियंत्रण कक्षाला याबाबतची माहिती मिळाली होती. त्यानंतर नियंत्रण कक्षाने ही माहिती पोलिसांना दिली. गुरुवारी (७ नोव्हेंबर) सकाळी पावणेनऊच्या सुमारास येरवडा पोलिसांना ही माहिती देण्यात आली. त्यानंतर पोलीस तात्काळ घटनास्थळी दाखल झाले. त्यांनी घटनास्थळाची पाहणी करुन मृतदेह ताब्यात घेतला.

मृतदेह आठ ते दहा दिवस जुना असल्याची माहिती, कवटी आणि वरील भाग कुत्र्यांनी खाल्ला

हा मृतदेह आठ ते दहा दिवस जुना असल्याचा प्राथमिक अंदाज आहे. हा मृतदेह सडलेल्या अवस्थेत असून मृतदेहाचा बराच भाग हा कुत्र्यांनी खाल्ला असल्याचं दिसून येत आहे. मृतदेहाच्या कमरेचा थोडाच भाग शिल्लक आहे. तर, कवटी आणि कमरेच्या वरचा भाग कुत्र्यांनी पूर्णपणे खाल्ला आहे. त्यामुळे या मृतदेहाची ओळख पटवणे कठीण झालं आहे.

मृतदेह बेवारस व्यक्तीचा असल्याचा संशय, शोध लावणे कठीण

पोलिसांच्या प्राथमिक अंदाजानुसार हा मृतदेह कुठल्या बेवारस व्यक्तीचा असल्याची शक्यता अधिक आहे. कारण, या परिसरात बरेच जण हे बेवारस आहेत. सध्या पोलिसांनी हा मृतदेह शवविच्छेदनासाठी ससून रुग्णालयात पाठवला आहे. आता या व्यक्तीचा मृत्यू कसा झाला, हे शवविच्छेदन अहवालातूनच समोर येणार आहे.