सरवणकर म्हणाले तिहेरी लढतीत अमित ठाकरेंना फायदा, ऑनलाईन पोलचा धक्कादायक अंदाज

शिवसेना माहीमची जागा सोडण्यास तयार होती. परंतु राज ठाकरे यांनी भेट नाकारल्यामुळे पक्षाने उमेदवार कायम ठेवल्याचा दावा आता केला जात आहे. इतकंच नाही, तर दुहेरी लढत झाली असती, तर शिवसेनेची सर्व मतं ठाकरेंच्या उमेदवाराला गेली असती, पण तिहेरी लढतीत अमित ठाकरेंना फायदा होईल, असा दावाच सरवणकरांनी केला.
Rupesh Mhatre : वरळी-वांद्रेत सेटिंगचा आरोप, माजी आमदाराला ठाकरेंनी बाहेर काढलं, शिंदेंनी दोन दिवसात पक्षात घेतलं

काय आहेत पोलचे अंदाज?

आता आमची मुंबई (_aamchi_mumbai_) आणि दादर मुंबईकर (dadarmumbaikar) या इन्स्टाग्राम पेजवरुन ऑनलाईन मतदान घेण्यात आले आहे. यामध्ये अमित ठाकरे (मनसे), महेश सावंत (ठाकरे गट), सदा सरवणकर (शिवसेना) आणि नोटा/इतर/अपक्ष असे पर्याय देण्यात आले आहेत. ८ नोव्हेंबर रोजी घेतलेल्या या ऑनलाईन पोलचे ९ नोव्हेंबर दुपारी तीन वाजेपर्यंतचे अंदाज समोर आले आहेत.

या अंदाजानुसार, अमित ठाकरे यांना सर्वाधिक म्हणजे ५४ टक्के मतं मिळाली आहेत. महेश सावंत यांना ३२ टक्के मतदारांनी कौल दर्शवला आहे. तर सदा सरवणकर यांना सर्वात कमी म्हणजे १२ टक्के मतं मिळाली आहेत. इतरांना २ टक्के पसंती आहे. ५ हजार ९५२ जणांनी आपले मत नोंदवले आहे.

या मतदानाची टक्केवारी आणि निकाल कुठल्याही क्षणी बदलू शकतात, त्यात अगदी उलटफेरही पाहायला मिळू शकतो. विशेष म्हणजे ऑनलाईन व्होटिंग असल्यामुळे यात मतदारसंघाबाहेरील युजर्सनीही आपली मतं नोंदवली आहेत. त्यामुळे हे आकडे प्रत्यक्ष मतदानाचे अजिबात निदर्शक नाही. ही आकडेवारी फसवीही असू शकते.

कोणाला कौल?

दादर, माहीममधला मतदार हा सुजाण आणि सुशिक्षित आहे. युवा मतदारांचा टक्काही इथे मोठा आहे. त्यामुळे तरुण नेतृत्वाचा विचार करताना अमित यांना प्राधान्य देण्याची शक्यता नाकारता येत नाही. शिवसेनेतील नेते अमित यांना पाठिंबा देण्याच्या तयारीत असतानाच सूत्रे फिरली. त्यामुळे आता ते काय धोरणात्मक निर्णय घेतात यावरही बरेच काही अवलंबून आहे. परस्परविरोधात उभ्या ठाकलेल्या कोणत्या सेनेचा झेंडा मतदार हाती घेतात, हे लवकरच स्पष्ट होईल.
Sada Sarvankar : उमेदवारी मागे घेण्याचा प्रचंड मोठा दबाव, सरवणकरांनी पहिल्यांदाच माघार न घेण्याचं कारण सांगितलं

मतदारांची संख्या

पुरुष : १ लाख १२ हजार ६३८
महिला : १ लाख १२ हजार ६५७
तृतीयपंथी : ७८