वडेट्टीवारांच्या लेकीची टॉर्चच्या उजेडात सभा, भाजपवर टीकेची झोड, महावितरणला शिव्यांची लाखोली

ब्रह्मपुरी मतदार संघातील सावली तालुक्यात येणाऱ्या आकापूर या गावात शिवानी वडेट्टीवार या गावात प्रचार सभा झाली. या गावात विजेचा लपंडाव सुरू आहे. अनेक दिवस येथील विद्युत पुरवठा ठप्प असते. जेव्हा शिवानी वडेट्टीवार गावात पोहोचल्या त्यावेळी बत्तीगुल होती. मोबाईलच्या टॉर्चमध्ये त्यांनी सभा घेतली. यावेळी महावितरणच्या कर्मचाऱ्यांना धारेवर धरताना त्यांनी शिव्या दिल्या. विकास गुजरातचा होत आहे, तुमच्या गावाचा नाही. तुमचे जीवनात अंधार पेरण्याचे कार्य भाजप करीत आहे. उद्या विजू भाऊ मोठ्या पदावर जाऊ शकतात. ते विरोधी पक्ष नेते आहेत, ते उद्याचे मुख्यमंत्री आहेत असं म्हणत त्यांना शिवानी वडेट्टीवारांनी निवडून देण्याचे आवाहन केले आहे.

तुमचे जीवन अंधारात टाकायचे काम भाजप सरकार करत आहे. महावितरणवाल्याला झापणार तर आहे, त्याची नाही काढली तर माझं नाव शिवानी विजय वडेट्टीवार नाही. XXXरात्रभर वीज घालवूनही यांना ८००-१००० रुपये बील पाठवायला लाज वाटत नाही. या लोकांची आम्ही फजिती करू. भाजप सरकारच्या कोणत्याच भूलथापांना बळी पडू नका. विजू भाऊंना बहूमताने निवडून द्यायचंय. पहिल्यांदा झालेल्या आमदाराला शिकायला दहा वर्षे जातील. आजचा विरोधी पक्षनेता उद्याचा मुख्यमंत्री राहतो. त्यामुळे आपला सर्वांगिण विकासासाठी आपल्याला विजूभाऊंना निवडून द्यायचं असल्याचं शिवानी वडेट्टीवार म्हणाल्या.

काँग्रेसचे आक्रमक नेते अशी विजय वडेट्टीवार यांची ओळख, त्यांची दुसरी ओळख म्हणजे त्यांची आक्रमक वक्तृत्व शैली. विरोधकांवर तुटून पडताना ते एक दोन शिव्यांचे काडतूस सोडतातच. आता त्यांची मुलगी शिवानी वडिलांच्या पाऊलावर पाऊल ठेवतेय, अशी चर्चा रंगली आहे. शिवानी वडेट्टीवार महावितरणच्या कर्मचाऱ्यांना शिव्याची लाखोली वाहताना दिसत आहेत. मात्र त्यांचा या भाषेवरून नेटकरी त्यांना ट्रोल करीत आहेत. हेच काय संस्कार? अशी टीकाही होताना दिसत आहे.