सिनेमागृहांवर बिग बजेट चित्रपटांच्या प्रदर्शनाचा सिलसिला सुरूच , या सिनेमांची उत्सुकता

तमिळ सुपरस्टार सूर्याचा ‘कंगुवा’ आधी दसऱ्याला प्रदर्शित होणार होता; परंतु रजनीकांत यांचा ‘वेट्टियन’ त्याच दिवशी प्रदर्शित होणार होता; त्यामुळे सूर्यानं त्याचा सिनेमा नोव्हेंबरच्या दुसऱ्या आठवड्यात आणायचं ठरवलं. हा सिनेमा हिंदीसह अनेक भारतीय भाषांमध्ये प्रदर्शित होत असल्यानं सूर्या आता ‘पॅन इंडिया स्टार’ होण्याचा प्रयत्न करत आहे. ‘ग्लॅडिएटर’ या हॉलिवूडच्या लोकप्रिय सिनेमाचा सिक्वेल प्रदर्शनासाठी सज्ज आहे.

रखडलेले सिनेमे प्रदर्शनासाठी
गोध्रा कांडावर आधारित असलेला ‘द साबरमती रिपोर्ट’ हा सिनेमा अनेकदा पुढे ढकलण्यात आला होता. तो लवकरच प्रदर्शित होत आहे. तर नोव्हेंबरच्या चौथ्या आठवड्यात अभिषेक बच्चन आणि शूजित सरकारचा ‘आय वॉट टू टॉक’ हा सिनेमा प्रदर्शित होईल. त्यांच्यासमोर अजय देवगण आणि अनीस बज्मी यांचा ‘नाम’ हा सिनेमा प्रदर्शित होतोय. हा सिनेमा कित्येक वर्षांपासून प्रदर्शनापासून वंचित राहिला होता.

अल्लू अर्जुनची लोकप्रियता जबरदस्त
डिसेंबरच्या पहिल्या आठवड्यात तेलुगू सुपरस्टार अल्लू अर्जुनचा ‘पुष्पा २’ प्रदर्शित होतोय. याच दिवशी ‘छावा’ हा सिनेमादेखील प्रदर्शित होणार होता. पण ‘पुष्पा २’च्या लोकप्रियतेमुळे ‘छावा’ हा सिनेमा पुढे ढकलण्यात आला आहे. पुढील आठवड्यात विधू विनोद चोप्रा यांच्या ‘ट्वेल्थ फेल’ या सिनेमाचा सिक्वेल अर्थात ‘झिरो से रीस्टार्ट’ प्रदर्शित होण्याची चिन्हं आहेत.

नाताळला मोठी स्पर्धा
यंदा नाताळची सुट्टी विचारात घेऊन चित्रपटांमध्ये प्रदर्शनासाठी जोरदार स्पर्धा होणार आहे. डिसेंबरच्या तिसऱ्या आठवड्यात ‘द लॉयन किंग’ फ्रेंचायझीचा प्रिक्वेल ‘मुफासा : द लॉयन किंग’ प्रदर्शित होईल. त्याच्या जोडीला ‘गदर’फेम अनिल शर्माचा ‘वनवास’ प्रेक्षकांच्या भेटीस येतोय. एटली दिग्दर्शित आणि वरुण धवन अभिनित ‘बेबी जॉन’ हा सिनेमाही त्याच दिवशी प्रदर्शित होणार आहे. ‘स्त्री २’ आणि ‘भूलभुलैय्या ३’ या हॉरर कॉमेडी सिनेमांच्या यशानंतर त्यांच्या निर्मात्यांनी नाताळच्या दिवशी ‘ओए भूतनी के’ हा सिनेमा प्रदर्शित करायचं ठरवलं आहे.

आगामी दिवसांमध्ये प्रदर्शित होणारे सिनेमे

१४ नोव्हेंबर – कंगुवा

१५ नोव्हेंबर – ग्लॅडिएटर २

१५ नोव्हेंबर – द साबरमती रिपोर्ट

२२ नोव्हेंबर – आय वॉट टू टॉक

२२ नोव्हेंबर – नाम

२९ नोव्हेंबर – बत्तमीज गिल

५ डिसेंबर – पुष्पा २ : द रूल

१३ डिसेंबर – झिरो से रीस्टार्ट

२० डिसेंबर – वनवास

२० डिसेंबर – मुफासा : द लॉयन किंग

२५ डिसेंबर – ओए भूतनी के

२५ डिसेंबर – बेबी जॉन