Vastu Shastra : ओट्यावर पोळ्या लाटणे योग्य आहे का? वास्तूशास्त्र काय सांगते? जाणून घ्या

वास्तु शास्त्रानुसार, स्वयंपाकघरात वापरले जाणारे पोळपाट -लाटणे हे सुख-समृद्धी देते. पोळपाट -लाटणे यांचा संदर्भ राहु-केतू ग्रहांशी जोडलेला असल्यामुळे ग्रहांचा प्रभाव घरावर पडतो. पोळपाट लाटणे खरेदी करण्यापासून ते वापरण्यापर्यंत काही नियम वास्तूशास्त्रात सांगितलेले आहेत.

खरंतर पोळ्या तयार करताना पोळपाट लाटण्याचाच वापर करणे योग्य आहे, वास्तू शास्त्रानुसार घराच्या प्रगतीसाठी ते महत्त्वाचे आहे. वास्तुशास्त्रानुसार जर घरातील ओट्यावर पोळ्या लाटल्या तर घरातील सुख-समृद्धीमध्ये अडचणी येऊ शकतात. वास्तुदोष किंवा धनसंपत्तीची कमी होवू शकते. माता अन्नपूर्णा नाराज होवू शकते. राहु-केतू ग्रहांचा वाईट प्रभाव घराच्या आनंदावर आणि यशावर होण्याची शक्यता असते. तसे पाहिले तर पोळपाट लाटण्यावर पोळ्या लाटणे योग्यच आहे कारण शास्त्रीय दृष्टीकोनातून पाहिलं तर स्वयंपाकाचा ओटा जिथे वेगवेगळी भांडी ठेवली जातात, भाजी चिरली जाते. ओटा आपण स्वच्छ करतो पण वारंवार साबणाने घासून त्याला स्वच्छ करणे शक्य नसते. तर पोळपाट लाटणे स्वच्छ घासून धुता येते. तुमच्याकडे भरपूर जागा असेल तर धुतल्यानंतर पोळपाट लाटणे उन्हात वाळवता येतो, त्यामुळे पोळपाट लाटणे याचा वापर करणे सहसा योग्य आहे.

पोळ्या करताना पोळपाटाचा आवाज होत असेल तर तो बदलून टाका, कारण पोळपाटाचा आवाज वास्तूदोष निर्माण करू शकतो. समजा तुम्हाला पोळपाट बदलायचा नसेल तर पोळपाटाच्या खाली एखादा कपडा किंवा पेपर ठेवावा. पोळपाट लाटण्याचा वापर झाल्यानंतर तो स्वच्छ धुवून ठेवा. आरोग्याच्या दृष्टीनेही हे महत्त्वाचे आहे. कारण अन्नकण पोळपाटावर राहिले आणि रात्रभर तो तसाच राहिला तर जंतूंचा प्रार्दुभाव होवू शकतो. तसेच धनसंपत्तीवर देखील परिणाम होतो म्हणून रात्री झोपण्यापूर्वी पोळपाट लाटणे स्वच्छ धुवून ठेवा.

वास्तूशास्त्रानुसार पोळपाट लाटणे बुधवारी खरेदी करावे. मंगळवार किंवा शनिवारी पोळपाट लाटणे खरेदी करू नका, समजा असे झाले तर घरातील नकारात्मक ऊर्जा वाढते. काही ठिकाणी पोळपाट लाटणे खरेदी करण्यासाठी शुभमुर्हुत पाहिला जातो. पोळ्या लाटून झाल्यानंतर अनेकांना पोळपाट उलटा ठेवण्याची सवय आहे, यामुळे वास्तूदोष लागू शकतो. धनसंपत्तीची हानी तसेच घरात गरिबी येवू शकते. म्हणून पोळपाट कणकेच्या डब्यावर किंवा ओट्यावर उलटे ठेवू नये. काही घरांमध्ये असा पोळपाट वापरला जातो त्याचे दोन पाय तुटलेले असतात आणि दोन पायांवर पोळपाटाचे काम सुरू असते. यामुळे वास्तूदोष होवू शकतो. असा पोळपाट त्वरित बदलून टाका.