सहावेळा पक्षांतर, निवडणुकीपूर्वी घरवापसी, तरीही जनतेनं कौल दिला, नांदेडमध्ये चिखलीकरांचं वर्चस्व

प्रताप पाटील चिखलीकर यांची मातब्बर नेता अशी ओळख आहे. चिखलीकर हे सरपंच पदापासून ते आमदार, खासदारपदी निवडून आलेत. विशेष म्हणजे कॉंग्रेस, राष्ट्रवादी काँग्रेस, लोकभारती, शिवसेना, भाजप आणि पुन्हा राष्ट्रवादी असा राजकीय प्रवास त्यांचा राहिला आहे. लोहा मतदार संघ हा चिखलीकर यांचा बालेकिल्ला म्हणून ओळखला जातो. २००४ मध्ये लोहा कंधार मतदार संघातून त्यांनी अपक्ष निवडणूक लढवून निवडणूक जिंकली. त्यांनतर २००९ साली त्यांचा मात्र पराभव झाला. पुन्हा ते २०१४ मध्ये शिवसेनेकडून निवडणुकीच्या रिंगणात उतरले आणि मैदान जिंकले. २०१९च्या लोकसभा निवडणुकीपूर्वी त्यांनी भाजपात प्रवेश केला. भाजपाने त्यांना लोकसभेसाठी मैदानात उतरवले. या निवडणुकीत चिखलीकर यांनी काँग्रेसचा गड भेदत माजी मुख्यमंत्री अशोक चव्हाण यांचा पराभव केला. या निवडणुकीत चिखलीकर हे जायंटकिलर ठरले.
Sudhakar Badgujar: मोठी बातमी : ठाकरे सेनेला निवडणूक आयोगाचा दिलासा, महाराष्ट्रातील ‘या’ मतदारसंघामध्ये फेर मतमोजणी

दरम्यान, २०२४च्या लोकसभा निवडणुकीत त्यांचा पराभव झाला. या पराभवानंतरही चिखलीकर यांनी लोहा मतदार संघातून विधानसभेची तयारी सुरु केली. लोहा मतदार संघ हा राष्ट्रवादी अजित पवार गटाला सुटल्याने ऐन निवडणुकीच्या तोंडावर प्रताप पाटील चिखलीकर यांनी राष्ट्रवादी पक्षात घरवापसी केली आणि विधानसभा निवडणुकीच्या आखाड्यात उतरून मोठ्या मताधिक्याने विजय मिळवला. चिखलीकर यांना ७२ हजार ७५० एवढी मत मिळाली. विशेष म्हणजे सहा मोठ्या निवडणुकींपैकी चार निवडणुकीत जनतेने प्रताप पाटील चिखलीकर यांना कौल दिला आहे. चिखलीकरांनी सरपंच पदापासून ते आमदार आणि खासदार पदाच्या एकूण १८ निवडणुका लढवल्या असून एकूण १६ निवडणुकीत त्यांनी विजय मिळवला आहे.

भाऊ बहिणीच्या लढतीत भाऊ ठरला सरस

लोहा मतदार संघात प्रताप पाटील चिखलीकर आणि आशाताई शिंदे या बहीण भावामध्ये निवडणूक होतं असल्याने संपूर्ण राज्याचं या मतदार संघाकडे लक्ष लागलं होतं. निवडणुकीच्या प्रचार काळात बहीण भावाकडून आरोप प्रत्यारोप करण्यात आले. कोण सरस ठरणार या बाबत उत्सुकता लागली होती. अखेर प्रताप पाटील चिखलीकर यांनी ७२ हजार ७५० मत घेऊन विजय मिळवला. दुसरीकडे त्यांची सख्खी बहिण तथा शेकापचे माजी आमदार श्यामसुंदर शिंदे यांच्या पत्नी आशा शिंदे यांना केवळ १९ हजार ७८६ मत मिळाली. भाऊ बहिणीच्या या लढतीत भाऊ सरस ठल्याच पाहायला मिळाले.

दरम्यान, या अभूतपूर्व यशानंतर आमदार प्रताप पाटील चिखलीकर हे मंत्री पदाच्या शर्यतीत असल्याची चर्चा आहे. चिखलीकर हे अनुभवी नेते आहेत. २००४ ते २०२४ या कालावधीत त्यांनी तीन विधानसभा आणि एक लोकसभा निवडणूक जिंकल्या आहे. देवेंद्र फडणवीस यांचे विश्वासू नेते ओळखले जातात, त्यामुळे मंत्री मंडळात त्यांना संधी मिळेल अशी चर्चा राजकीय वर्तुळात सुरु आहे.