शेतकऱ्यासाठी राबलेल्या ‘धर्मराज’चं निधन; परिवारासह अख्खं गाव हळहळलं

जगदाळे कुटुंबासाठी धर्मराज भाग्यवान ठरला. घरातील व्यक्ती त्याच्याजवळ आल्यास तो हंबरडा फोडत असे तर बाहेरची व्यक्ती अथवा मोकाट कुत्रे आल्यावर तो सैरभैर होत असे. त्यामुळे जगदाळे कुटुंबातील या धर्मराजाची गावासह परिसरात तसेच नागरिकांमध्ये चर्चा होती. घरातील सदस्य प्रमाणेच धर्मराज हा बैल राबराब राबत होता. त्याचेच फळ म्हणून जगदाळे कुटुंबाची आर्थिक परिस्थिती सुधारली. असं असताना २७ नोव्हेंबर रोजी अचानक धर्मराजचा मृत्यू झाला. धर्मराजच्या अचानक एक्झिटनंतर अख्खं कुटुंब दुःखात बुडाले आणि कुटुंबासह संपूर्ण गाव हळहळले. आयुष्यभर राबणाऱ्या धर्मराज याला अखेरचा निरोप देण्यासाठी नातेवाईक गावकरी अंत्ययात्रेला आले.

धर्मराजची अंत्ययात्रा आणि उत्तरकार्य

जगदाळे कुटुंबावर २७ नोव्हेंबर रोजी दुःख कोसळले. आयुष्यभर पोटाच्या पोराप्रमाणे सांभाळ केलेल्या धर्मराज या बैलाचे निधन झाले. गावकरी आणि नातेवाईक धर्मराजाच्या अंत्ययात्रेसाठी एकत्र आले. अंबापूरच्या जगदाळे कुटूंबियांच्या मनाला चटका लावणाऱ्या घटनेनंतर ‘धर्मराज’ची गावातून अंत्ययात्रा काढण्यात आली. यावेळी माणसावर ज्या पद्धतीने अंत्यसंस्कार करण्यात येतात, तशाच पद्धतीने वाजा लावून, नवे कपडे घालून सर्व विधी पार पाडल्या. शेकडो नातेवाईक आणि गावकरी आले. त्यांनी धर्मराजला अखेरचा निरोप दिला. त्यानंतर कुटुंबियांनी नातेवाईकांना कै. धर्मराज मोतीराम जगदाळे याचे निधन झाल्याचा मेसेज टाकून उत्तर कार्याला उपस्थित राहण्याचे आमंत्रण दिले. पिंडदान, दशक्रिया आदी. विधी करत १ डिसेंबर रोजी उत्तरकार्याचे आयोजन करण्यात आले होते. यावेळी गावातील नागरिक तसेच नातेवाईक असे ६०० लोकांना जगदाळे कुटुंबियांनी जेवण खाऊ घातले. आयुष्यभर कुटुंबासाठी राबणाऱ्या सर्जाबद्दल कृतज्ञता व्यक्त करणाऱ्या बळीराजाने घडविलेल्या माणूसकीच्या कुटुंबीयांची जिल्हाभर चर्चा सुरू आहे.