महाराष्ट्र पोलीस दलाची शारीरिक क्षमता आणि स्पर्धात्मक भावना दाखविण्याची संधी – उपमुख्यमंत्री एकनाथ शिंदे – महासंवाद

ही क्रीडा स्पर्धा महाराष्ट्राची ‘महा ऑलिम्पिक’

ठाणे, दि.27(जिमाका) : पोलीस विश्वात होणारी महाराष्ट्र राज्य पोलीस क्रीडा स्पर्धा महाराष्ट्राची ‘महा ऑलिम्पिक’ असून महाराष्ट्र पोलीस दलाची शारीरिक क्षमता आणि स्पर्धात्मक भावना दाखविण्याची ही एक संधी आहे, असे प्रतिपादन उपमुख्यमंत्री तथा ठाणे जिल्ह्याचे पालकमंत्री एकनाथ शिंदे यांनी आज येथे केले.

येथील साकेत मैदानावर 35 व्या महाराष्ट्र राज्य पोलीस क्रीडा स्पर्धा 2025 चा दिमाखदार शुभारंभ उपमुख्यमंत्री आणि ठाण्याचे पालकमंत्री एकनाथ शिंदे यांच्या हस्ते संपन्न झाला, त्यावेळी ते बोलत होते.12 वर्षांनंतर ठाणे पोलीस आयुक्तालयाने आयोजित केलेला हा कार्यक्रम राज्याच्या क्रीडा दिनदर्शिकेतील एक महत्त्वाचा क्षण आहे.

या दिमाखदार सोहळ्याला परिवहन मंत्री प्रताप सरनाईक, गृहराज्यमंत्री योगेश कदम, महाराष्ट्र पोलीस महासंचालक (डीजीपी) रश्मी शुक्ला, तसेच राज्यभरातील वरिष्ठ पोलीस अधिकारी उपस्थित होते. ठाण्याचे जिल्हाधिकारी अशोक शिनगारे, ठाणे महानगरपालिका (टीएमसी) आयुक्त सौरभ राव, आमदार संजय केळकर आणि आमदार निरंजन डावखरे यांचीही विशेष उपस्थिती होती.

उपमुख्यमंत्री एकनाथ शिंदे यांनी आपल्या भाषणात महाराष्ट्र पोलीस कर्मचाऱ्यांच्या क्रीडा वृत्ती आणि समर्पणाचे कौतुक केले. त्यांनी डीजीपी रश्मी शुक्ला यांचा “लाडकी बहीण” असा उल्लेख करीत खेळाडूंना जागतिक स्तरावर आपली ताकद आणि शिस्त दाखवण्याचे आवाहन केले.

पोलिसिंगमध्ये तंदुरुस्तीचे महत्त्व अधोरेखित करताना श्री.शिंदे म्हणाले, “पोलिस दलाच्या ध्येयाचे पालन करायचे असेल तर तंदुरुस्तीला पर्याय नाही. खेळ मानसिक आणि शारीरिक आरोग्य सुधारतात, तसेच अधिकाऱ्यांमध्ये सांघिक भावना, नेतृत्व आणि आत्मविश्वास वाढवितात, असेही त्यांनी नमूद केले.

न्यायालयात खटल्यांचे दोषसिद्धीचे प्रमाणही समाधानकारक असून, पोलीस दलाची कार्यक्षमता वाढवण्यासाठी शासन सर्वोत्तम सुविधा आणि पायाभूत सुविधा उपलब्ध करून देण्यासाठी सर्वतोपरी प्रयत्न करीत असल्याचे त्यांनी सांगितले.

याप्रसंगी चांगल्या क्रीडा सुविधांची गरज ओळखून शिंदे यांनी ठाण्याचे जिल्हाधिकारी अशोक शिनगारे यांना साकेत मैदानावर सिंथेटिक ट्रॅक आणि उच्च मास्ट लाइटिंग उपलब्ध करून देण्याचे निर्देश दिले. या सुधारणांचा ठाणे पोलीस आणि स्थानिक खेळाडूंना फायदा होईल, असे आश्वासन त्यांनी दिले.

श्री.शिंदे यांनी खेळाडूंना प्रोत्साहन देताना म्हटले की, “जिंकणे किंवा हरणे महत्त्वाचे नाही; प्रत्येक सहभागी विजेता आहे. महाराष्ट्र पोलीस ‘खिलाडी नंबर १’ आहेत आणि ही स्पर्धा जगाला ते सिद्ध करण्याची सर्वोत्तम संधी आहे.”

त्यांनी ऑल इंडिया पोलीस स्पर्धेत उत्कृष्ट कामगिरी करणाऱ्या महाराष्ट्राच्या फोर्स वन संघाचेही कौतुक केले, ज्यांनी चक्रव्यूह अर्बन वॉरफेअर ट्रॉफी आणि चक्रव्यूह जंगल वॉरफेअर ट्रॉफी जिंकली.

महाराष्ट्र पोलीस कर्मचारी राष्ट्रीय आणि आंतरराष्ट्रीय क्रीडा स्पर्धांमध्ये उत्कृष्ट कामगिरी करीत राहतील, असा विश्वास श्री.शिंदे यांनी व्यक्त केला. भारत देशातील सर्वोत्तम दलांमध्ये स्थान टिकवून ठेवण्यासाठी शासन सर्व आवश्यक सुविधा उपलब्ध करून देईल, असे आश्वासन त्यांनी यावेळी दिले.

आपल्या भाषणाचा समारोप त्यांनी “रडण्याने नशीब बिघडते, हिंमतीने ते घडते. हरल्याने कोणी फकीर होत नाही आणि जिंकल्याने अलेक्झांडर होत नाही.”  या प्रेरणादायी पंक्तीनी केले.

ठाणे पोलीस आयुक्त आशुतोष डुंबरे यांनी या स्पर्धेचे आयोजन केल्याबद्दल समाधान व्यक्त केले. दि.22 फेब्रुवारी ते 1 मार्च 2025 या कालावधीत होणाऱ्या या क्रीडा स्पर्धेत 18 विविध खेळांचा समावेश आहे.

महाराष्ट्र पोलीस दलातील एकूण 13 संघ सहभागी झाले असून 2 हजार 929 खेळाडू (2 हजार 323 पुरुष आणि 606 महिला) विविध गटांमध्ये स्पर्धा करणार आहेत.

दि.1 मार्चपर्यंत ही स्पर्धा सुरू राहणार असून, पोलीस कर्मचारी या प्रतिष्ठित स्पर्धेत शिस्त, सहनशक्ती आणि क्रीडावृत्तीचे प्रदर्शन करीत अव्वल स्थानासाठी स्पर्धा करीत आहेत. दि.1 मार्च 2025 रोजी होणाऱ्या या स्पर्धेच्या समारोप समारंभाला मुख्यमंत्री देवेंद्र फडणवीस प्रमुख पाहुणे म्हणून उपस्थित राहणार आहेत.

0000