Tej Police Times
मुंबई : आरोग्य सेवा आयुक्त तुकाराम मुंढे यांनी थेट सरकारी रुग्णालय गाठून गरिबांना मिळणाऱ्या सुविधा आणखी दर्जेदार करण्याचे आदेश दिले. आरोग्य सेवा आयुक्तपदाचा पदभार स्वीकारताच निर्णयांचा धडाका लावला आणि तिथेच तुकाराम मुंढे निशाण्यावर आले. शिंदे सरकारने नवी नियुक्ती दिल्यानंतर दोनच महिन्यात तुकाराम मुंढेंना पुन्हा हटवण्यात आलं आहे. तुकाराम मुंढेंविरोधात लॉबी सक्रिय झाल्यामुळे सरकारने दबावातून ही बदली केल्याचं बोललं जातं आहे. पण तुकाराम मुंडे यांनी काही अधिकाऱ्यांना घाम फोडणारी माहिती मागवली होती आणि ती माहिती मिळण्यापूर्वीच त्यांना हटवण्यात आल्याचंही सांगितलं जात आहे. सरकारी दवाखान्यांचा कायापालट करण्याची शपथ घेणाऱ्या तुकाराम मुंढेंनी नेमका कुणाला घाम फोडला होता आणि दोनच महिन्यात बदली का झाली, याबाबतही आता चर्चा रंगू लागली आहे.
जगप्रसिद्ध ताडोबात आढळले दोन वाघांचे शव; वन विभाग म्हणाले…
काय आहेत तुकाराम मुंढेंच्या बदलीची कारणं?
तुकाराम मुंढे पुढची धोरणं आखत असतानाच त्यांच्या बदलीचा आदेशही आला. आता तुकाराम मुंढे यांच्या बदलीची जी कारणं सांगितली जातायत ती सुद्धा तशीच आहेत. सूत्रांच्या माहितीनुसार, तुकाराम मुंढेंनी करोना काळातील गैरव्यवहाराची माहिती मागवल्याची चर्चा आहे. सरकारी डॉक्टरांच्या खाजगी प्रॅक्टिसवर मर्यादा आणून जास्तीत जास्त सरकारी सेवेची सक्ती त्यांनी केली. रेफरल म्हणजेच सरकारी रुग्णालयातल्या पेशंटला खाजगी रुग्णालयात जाण्याचा सल्ला देण्यावर बंदी आणण्यात आली आणि यामुळे खाजगी दवाखान्यांचे धाबे दणाणले. खाजगी दवाखान्यातल्या औषधांऐवजी सरकारी रुग्णालयातलीच औषधं देण्याला प्राधान्य देण्याचे आदेश दिले. कोणत्या सरकारी डॉक्टरांचे नातेवाईक खाजगी दवाखाने चालवतात याचीही फाईल मागवल्याची माहिती आहे. रेफरल बंद करण्याच्या दृष्टीने हे मोठं पाऊल मानलं जात होतं आणि हाच निर्णय तुकाराम मुंढेंची अडचण वाढवणारा ठरला का, असा प्रश्न उपस्थित होतो.
सरकार २५ वर्षे मोफत वीज देणार! असा करा ऑनलाइन अर्ज, पाहिजे तेवढा चालवा एसी, हिटर, गिझर
आरोग्य क्षेत्रातील सूत्रांच्या माहितीनुसार, तुकाराम मुंढेंनी ही माहिती मागवली आणि लॉबी सक्रिय झाली. खाजगी दवाखान्यांना या निर्णयामुळे मोठा फटका बसू शकला असता, असंही सांगितलं जातंय. तुकाराम मुंढेंच्या बदलीत आपला कोणताही सहभाग नसल्याचं सांगून आरोग्यमंत्र्यांनी तर हा विषय त्यांच्या बाजूने संपवलाय, पण खाजगी दवाखाने परवडत नसल्यामुळे कायम सरकारी दवाखान्यातच जाणारे रुग्ण अजूनही तुकाराम मुंढेंच्या बदलीमुळे चक्रावून गेले आहेत. सरकारने जर एखाद्या लॉबीमुळे तुकाराम मुंढेंसारख्या कर्तव्यनिष्ठ अधिकाऱ्याची बदली केली असेल तर ते सर्वात मोठं आपल्या आरोग्य व्यवस्थेचं नुकसान ठरू शकतं. कारण, तुकाराम मुंढेंचे सरकारी दवाखान्यातले दौरे पाहून इथेही आता खाजगीसारखीच सुविधा मिळेल याबाबत रुग्ण निश्चिंत झाले होते आणि त्यापूर्वीच बदलीचा आदेश निघाला आहे.