शिंदे-फडणवीसांबरोबर महाडिक सीमाप्रश्नाच्या चर्चेला, पक्षाकडून लवकरच मोठी जबाबदारी?

दोन राज्याच्या प्रमुखांच्या बैठकीस खासदार धनंजय महाडिक यांनाही उपस्थित राहण्याची संधी मिळाली. यामुळे एकमेव खासदार उपस्थित असल्याने त्यांच्या नावाची चर्चा सुरू झाली. महाडिक हे फडणवीस यांच्यासह मंत्री चंद्रकांत पाटील यांचे निकटवर्ती मानले जातात. कोल्हापूर हे सीमारेषेवर असल्याने त्यांचा या विषयावर अभ्यास आहे. लोकसभेत काम करताना त्यांना आपली अभ्यासू खासदार अशी प्रतिमा निर्माण केली. यामुळे त्यांना तीनवेळा संसदरत्न पुरस्कारही मिळाला. या सर्व पार्श्वभूमीवर महाडिक यांच्या दिल्लीतील या बैठकीतील उपस्थिती त्यांचे राजकीय महत्त्व वाढविणारे असल्याचे संकेत आहेत. त्यांना पश्चिम महाराष्ट्राची जबाबदारी देण्याच्या हालचाली पक्षात सुरू आहेत. आजच्या बैठकीतील त्यांची एकमेव उपस्थिती ही त्यांना पक्षात मोठी संधी मिळणार असल्याची नांदी असल्याचे बोलले जात आहे.