नववर्षाचे स्वागत थंडीने होण्याची शक्यता; पहिल्याच आठवड्यात गारठा वाढणार

मुंबईमध्ये शुक्रवारी गुरुवारच्या तुलनेत कमाल तापमान किंचित कमी झाले. किमान तापमानात शुक्रवारी फारसा फरक पडला नसला तरी शनिवारी आणि नव्या वर्षाच्या स्वागताला रविवारी १ जानेवारी रोजी किमान तापमानाचा पारा १५ ते १६ अंशांदरम्यान असू शकेल असे अनुमान भारतीय हवामान विभागाने वर्तवले आहे. मुंबईमध्ये कुलाबा येथे शुक्रवारी २१ अंश सेल्सिअस किमान तापमानाची नोंद झाली. तर सांताक्रूझ येथे १८.२ अंश सेल्सिअस किमान तापमान नोंदले गेले. तर कमाल तापमान कुलाबा येथे २९.६ आणि सांताक्रूझ येथे ३१.५ अंश सेल्सिअस नोंदले गेले. कुलाबा येथे गुरुवारी ३०.६ तर सांताक्रूझ येथे ३३.३ अंश सेल्सिअस कमाल तापमान होते. शुक्रवारी अधूनमधून गार वाऱ्यांची जाणीव झाल्यानंतर आता आज, शनिवारी किमान तापमानाचा पारा थोडा खाली येण्याची शक्यता आहे.

उत्तरेतील हिमवर्षावामुळे गारठा

उत्तर भारतातील पश्चिमी प्रकोपामुळे २३ ते २७ डिसेंबरदरम्यान महाराष्ट्रात काहीशी थंडी निर्माण झाली. सध्या तिथे दाट धुक्याची चादर असून याचा परिणाम महाराष्ट्रावर झाला आहे. या वातावरणामुळे राज्यातील थंडी काहीशी कमी झाल्याचे निवृत्त हवामान विभाग अधिकारी माणिकराव खुळे यांनी सांगितले. यानंतर पुन्हा पश्चिमी प्रकोपामुळे १ जानेवारी २०२३ पासून उत्तर भारतात हिमवर्षावाची शक्यता आहे. यामुळे महाराष्ट्रात थंडीचा प्रभाव थोडा वाढू शकेल अशी शक्यता त्यांनी वर्तवली. या काळात राज्यात महाराष्ट्राची पाऊस पडण्याची शक्यता नाही, असेही त्यांनी स्पष्ट केले आहे. थंडीचा प्रभाव राज्यात या काळात खूप तीव्र नसेल असे हवामान विभागातर्फे सांगण्यात आले आहे.