लोहगडावरील संदल उरुसाला हिंदुत्त्वावादी संघटनांचा विरोध, पोलिसांकडून तीन दिवस जमावबंदी

६ जानेवारीच्या लोहगड किल्ल्यावरील हाजी हजरत उमरशावली बाबा दर्ग्याच्या उरुसाच्या कार्यक्रमाच्या अनुषंगाने लोहगड व घेरेवाडी परिसरात कायदा व सुव्यवस्था अबाधित राहण्यासाठी ५ जानेवारी ते ८ जानेवारी संध्याकाळी सहा वाजेपर्यंत जमावबंदी राहणार आहे. लोहगड परिसरात या दृष्टीने पोलीस अधीक्षक कार्यालय पुणे ग्रामीण यांच्याकडून योग्य तो पोलीस बंदोबस्त लावण्यात आला आहे. जमावबंदी दरम्यान आदेशाचे उल्लंघन करणाऱ्यांवर योग्य ती कारवाई करण्याचे संकेत पुणे ग्रामीणचे पोलीस अधीक्षक अंकित गोयल यांनी दिले आहेत.

काय दिलेत आदेश ?

कोणतीही व्यक्ती इंस्टाग्राम, व्हाट्सअप, ट्विटर, फेसबुक आणि इतर समाज माध्यमांद्वारे अफवा, जातीय द्वेष पसरवणारे संदेश खोटी माहिती पोस्ट करणार नाही किंवा फॉरवर्ड करणार नाही. असे केल्यास त्याबाबतची जबाबदारी संबंधित पोस्ट करणारी व्यक्ती तसेच ग्रुप ॲडमिनची राहील.
लोहगड व घेरेवाडी हद्दीमधील गावांमध्ये स्थानिक प्रशासन व पोलीस विभागाच्या लेखी परवानगीशिवाय सार्वजनिक ठिकाणी बॅनर, फ्लेक्स, होर्डिंग लावण्यास प्रतिबंध राहील.

या परिसरात कोणते नियम लागू असतील?

* सदर परिसरामध्ये पाच पेक्षा जास्त व्यक्तीने जमा होण्यास बंदी.

* समाज भावना भडकवतील अशा घोषणा किंवा भाषण करू नये.

* या परिसरामध्ये मोर्चा आंदोलन करण्यास प्रतिबंध.

* प्रतिबंधात्मक कालावधी दरम्यान धार्मिक विधीसाठी पशु-पक्ष्यांचा बळी दिला जाऊ नये.

* सदर परिसरामधील ऐतिहासिक व सार्वजनिक वस्तूंचे नुकसान करण्यात येऊ नये.