Latur News: बाबासाहेबांच्या ७२ फुटी पुतळ्यासाठी लातूरकर आग्रही, आंबेडकर पार्कात जमली गर्दी

शहरातील डॉ. बाबासाहेब आंबेडकर पार्क येथे खा. सुधाकर शृंगारे यांचे सुपुत्र शंकर शृंगारे यांनी डॉ. बाबासाहेब आंबेडकर यांचा प्लास्टिक ऑफ पॅरिसचा ७२ फूट उंचीचा पुतळा तात्कालिक उभारला होता. आंबेडकर जयंती झाल्यानंतर हा पुतळा सुस्थितीमधे काढून घेणे अपेक्षित होते. मात्र, हा पुतळा सध्या डॉ.आंबेडकर पार्कवरच असून त्याला प्लास्टिकने कव्हर करून ठेवले आहे. आता आंबेडकर प्रेमींनी महानगरपालिका आयुक्तांना डॉ. बाबासाहेब आंबेडकर यांच्या ७२ फूट उंचीच्या पुतळ्यासाठी निवेदन दिले आहे.
बाबासाहेबांच्या ‘या’ १० विचारांमध्ये आजही लाखो तरुणांचे जीवन बदलण्याची ताकद
शौर्य दिनानिमित्त भीमा कोरेगाव येथेही आंबेडकरी प्रेमींनी लातूर येथे डॉ. बाबासाहेब आंबेडकर यांचा ७२ फूट उंचीचा पुतळा उभा रहावा म्हणून हातात फलक घेऊन पाठिंबा दिला होता. तर नुकत्याच पार पडलेल्या हिवाळी अधिवेशनात भाजप आमदार संभाजी पाटील निलंगेकर यांनी डॉ. बाबासाहेब आंबेडकर यांचा ७२ फूट उंचीचा पुतळा लातूर शहरातील डॉ. आंबेडकर पार्कवर उभारण्याची मागणी केली होती. पण आमदार अमित देशमुख यांनी या पुतळा उभारणीला विरोध दर्शवत एका पार्कवर दोन पुतळे हे कितपत योग्य असल्याचा सवाल उपस्थित केला होता. मात्र, अधिवेशन होऊन परतताच आंबेडकरीप्रेमींनी यावर आक्षेप घेत नाराजी व्यक्त केली होती. अस्मितेचा मुद्दा बनलेल्या या पुतळा राजकारणाचे पडसाद येत्या महानगर पालिकेच्या निवडणुकीत न दिसले तरच नवल. त्यामुळे आता प्रशासन हा तिढा कसा सोडवणार, हे पाहावे लागेल.