दोन मित्र बुडू लागले, एकमेकांचा हातही धरला, पण तलावाखालील विहिरीमुळे घात, अकोल्यात हळहळ

अकोला : चौघे मित्र काल दुपारच्या सुमारास एका तलावात पोहण्यासाठी गेले, तलावात दूरपर्यंत पोहोचताना अचानक दोघे जण बेपत्ता झाले, त्यांच्या दोन्ही मित्रांनी दोघा तरुणांचा शोध घेतला, पण त्यांचा पत्ता लागला नाही. अखेर पोलिसांसह आपत्कालीन शोध पथक घटनास्थळावर दाखल झालं. अखेर दोघांचेही मृतदेह हाती लागले.

मरण पावलेल्या दोघांनाही पाण्यात चांगल्याप्रकारे पोहता येत होतं, मात्र तलावाच्या मधोमध पंधरा ते वीस फूट खोल विहीर असल्याने त्यांना पाण्याचा अंदाज घेता आला नाही, आणि दोघेही एकमेकांना पकडून बाहेर येण्याचा प्रयत्न करीत असतानाच त्यांच्या पाण्यात बुडून मृत्यू झाला असावा, असा अंदाज घटनास्थळीवर वर्तवला जात होता. ही घटना आहे अकोला जिल्ह्यातील कान्हेरी ते एरंडा रस्त्यावरील.

काय आहे संपूर्ण घटना?

प्राप्त माहितीनुसार, अकोला जिल्ह्यातील कान्हेरी इथल्या कारखान्यात काम करणारे मध्य प्रदेशातील मजूरवर्ग आपल्या कुटुंबासह राहतात. या कुटुंबातील अनिल शन्नीलाल उईके (वय २८ वर्ष, राहणार ब्रजपुरा ता. जुन्नारदेव जि. छिंदवाडा मध्यप्रदेश) आणि पुष्पेंद्र कनस कुमरे (वय २५ वर्ष, राहणार पसलाई जि. बैतुल मध्य प्रदेश) हे दोघे आणि त्यांचे आणखी दोन मित्र असे चौघे जण आंघोळीसाठी परिसरातीलच तलावाजवळ गेले, अन् पाण्यात उतरले असता तलावात दूरपर्यंत पोहत गेले.

दरम्यान दोघेही तलावात अचानक बेपत्ता झाले. यावेळी सोबतचे दोन्ही मित्र घाबरले व बाहेर आले आणि परिवारातील लोकांना याची माहिती दिली. या घटनेची माहिती सायंकाळी बार्शीटाकळी पोलिसांनाही देण्यात आली. पोलीस निरीक्षक संजय सोळंके हेही घटनास्थळावर हजर झाले. पाण्यात बेपत्ता असलेल्या दोघांचा शोध घेण्यासाठी पिंजर येथील मानवसेवा आपत्ती व्यवस्थापन फाऊंडेशनच्या संत गाडगेबाबा आपत्कालीन शोध व बचाव पथकाचे प्रमुख दिपक सदाफळे यांना बोलावले. लागलीच त्यांनी घटनास्थळी धाव घेतली. रेस्क्यू बोट व शोध बचाव साहित्यासह सर्च ऑपरेशन सुरू केले.

हेही वाचा : कार सनरुफमधून डोकवताना मांजाने गळा चिरला, मुंबईकर चिमुरड्याने आईच्या मांडीवर प्राण सोडले

त्यांच्या सोबत असलेल्या मित्रांनी ज्या ठिकाणी ते बुडाले ती जागा दाखवली. परंतु तिथे काही दिसून येत नव्हते, पण अंडर वॉटर सर्च केले असता तलावात तळाशी एक मोठी विहीर दिसून आली, त्यामध्ये सुमारे १५ ते २० फूट इतके खोल पाणी असल्याचा अंदाज आला. त्यानंतर या विहिरीत सर्च ऑपरेशन केले तेव्हा लागलीच तळाशी एक मृतदेह हाती लागला. तर दुसरा मृतदेह तिसऱ्या टप्प्यात सापडला. दोन्ही मृतदेहांवर वैद्यकीय तपासणी प्रक्रिया पार करून नातेवाईकांच्या ताब्यात देण्यात आले आहेत.

हेही वाचा : महिलेने पतीचा झोपेतच मृत्यू झाल्याचं सांगितलं, नंतर घडलं असं काही की पत्नीला झाली अटक