तो कसा दिसतो, धर्म कोणता बोलणाऱ्यांनो… शाहरुखवर जळणाऱ्यांसाठी हेमांगी कवीची झणझणीत पोस्ट

मुंबई- लोकप्रिय मराठमोळी अभिनेत्री हेमांगी कवी सोशल मीडियावर प्रचंड सक्रिय असते. ती आपल्या वैयक्तिक आयुष्यातील गोष्टी चाहत्यांसोबत शेअर करत असते. त्यातच ती आपल्या पोस्टमधून चाहत्यांसोबत गप्पाही मारत असते. सोबतच लोकांच्या डोळ्यात अंजन टाकण्याचं कामही करत असते. अशातच तिने नुकतीच केलेली एक पोस्ट सोशल मीडियावर प्रचंड चर्चेत आहे. ही पोस्ट आहे बॉलिवूडचा किंग शाहरुख खान याच्याबद्दल. ‘पठाण’ प्रदर्शित झाला आणि पुन्हा एकदा शाहरुखच्या चाहत्यांचं वादळ बॉक्स ऑफिसवर धडकलं. प्रदर्शनाच्या ४ दिवसातच चित्रपटाने २०० कोटींची कमाई केली. हेमांगीदेखील शाहरुखची मोठी फॅन आहे. त्यामुळेच तिने आपल्या लाडक्या अभिनेत्याचा द्वेष करणाऱ्यांसाठी खास पोस्ट शेअर केली आहे.

इन्स्टाग्रामवर पोस्ट करत तिने लिहिलं, ‘तो कसा दिसतो, त्याचा धर्म काय, कसा बोलतो, अभिनेता म्हणावं का याला वगैरे वगैरे बोलणाऱ्यांनो तुम्ही आता खरंच बंद पडा! अनेक वर्षांपासून ही चर्चा होत आलीये पण आता ती थांबवुया. काय? त्याच्या धर्मामुळे, त्याच्या हिरोसारखा दिसत नसणाऱ्या लूकमुळे त्याचा पराकोटीचा द्वेष करणारे आपण सगळ्यांनीच पाहीले आहेत. मी त्याची फॅन आहे कळल्यावर अनेक जणांनी मला अनफॉलो केलं. याहून बालिश प्रकार मी पाहीला नाही. असो. मला वाटतं या द्वेषाचं मुळ कारण हे लोक अनाहुतपणे स्वतःची त्याच्याशी तुलना करत असावेत. हा सगळ्या बाबतीत आपल्यापेक्षा डावा असून ही तो इतका यशस्वी कसा? आणि आता तर या वयातही.’

पुढे तिने लिहिलं, ‘सिनेमा प्रदर्शनासाठी लागणारे सगळे ठोकताळे बाजूला सारून घरबसल्या घरी बसणाऱ्या लोकांना थिएटरमध्ये आणणे हे हाच करू जाणे. स्वतःच्या मुलाच्या बाबतीत त्याने दाखवलेला संयम (भल्या भल्यांनाही जमला नसता) त्याला या वयात जरा जास्तच आकर्षक बनवतो. उफ्फ अपन तो पहलेसे लुटे हुए थे, अब तो पुरे बरबाद हो गए. पन्नाशीनंतर रिटायरमेंटचे प्लॅन करून मोकळे झालेल्यांनो द्वेष करण्यापेक्षा त्याच्याकडून काहीतरी शिकूया.
तुमच्या ५७ व्या वर्षी जर तुम्ही २०- २२ वयाच्या मुला-मुलींना नाचवू शकत असाल, वेड लावू शकत असाल तर पुढे बोला. बाकी, झूमे जो पठान मेरी जान, महफ़िल ही लूट जाए!’ तिची ही पोस्ट नेटकऱ्यांमध्ये प्रचंड व्हायरल झाली आहे. अनेक नेटकरी त्यावर आपल्या प्रतिक्रिया देत आहेत.