जनजागृतीने आला ‘एड्स’ नियंत्रणात; मागील चार वर्षांत रुग्णांचे मृत्यू घटले

मुंबई : प्रगत ‘एआरटी’ उपचारपद्धती, विविध पातळ्यांवरील प्रयत्न आणि समुपदेशन यामुळे ‘एचआयव्ही’ नियंत्रणात ठेवण्यासह मृत्यूसंख्येमध्ये घट होत आहे. मागील चार वर्षांत ‘एचआयव्ही’ रुग्णांच्या मृत्यूचे प्रमाण कमी करण्यात मुंबई जिल्हा एड्स नियंत्रण सोसायटीला यश आले आहे.

उपलब्ध माहितीनुसार, मुंबईमध्ये सन २०१९-२०मध्ये ४,४७३ एचआयव्हीचे रुग्ण आढळले होते. तर १,२६५ रुग्णांचा एचआयव्हीमुळे मृत्यू झाला होता. सन २०२०-२१मध्ये करोनामुळे चाचण्यांसह शिबिरांची संख्याही कमी झाली. रुग्णांशी संपर्क साधण्यावरही मर्यादा आल्या. परिणामी रुग्णसंख्येची नोंद कमी झाल्याची शक्यता नाकारता येत नाही. सन २०२०-२१मध्ये मुंबईमध्ये २,०६३ इतकी एचआयव्ही रुग्णसंख्या असताना, मृत्यूची संख्याही कमी दिसून आली. या वर्षात १,१५८ जणांचा मृत्यू झाला.

करोनाचा प्रादुर्भाव कमी झाल्यानंतर चाचण्यांसह शिबिरांची संख्याही वाढवण्यात आली. रुग्णांशी असलेला संपर्क वाढला त्यामुळे सन २०२१-२२मध्ये मुंबईमध्ये ३,०८७ रुग्णसंख्येची नोंद झाली, २०१९-२०च्या तुलनेत ही संख्या जवळपास १,४०० ने कमी होती. तसेच मृत्यूच्या संख्येतही २०१९-२०च्या तुलनेत किंचित घट झाली. एचआयव्ही रुग्णांच्या व मृत्यूच्या संख्येत २०२२-२३मध्ये घट कायम राहिली. सन २०२२-२३मध्ये मुंबईमध्ये फक्त १,९१० एचआयव्ही रुग्ण आढळले, तर ६५४ जणांचा मृत्यू झाल्याचे दिसून आले.

सातत्याने केलेल्या जनजागृतीमुळे सर्वसामान्यांमध्ये जागरुकता निर्माण करण्यात यश येत आहे. एचआयव्हीची रुग्ण संख्या रोखण्याबरोबरच मृत्यूचे प्रमाण कमी करण्यात यश येत असल्याचे, मुंबई जिल्हा एड्स नियंत्रण सोसायटीचे अतिरिक्त प्रकल्प संचालक डॉ. विजयकुमार करंजकर यांनी दिली.

अशी आहे स्थिती

वर्ष -रुग्ण- मृत्यू

२०१९-२० ४४७३ – १२६५

२०२०-२१ २०६३- ११५८

२०२१-२२ ३०८७ – १२४५

२०२२-२३ १९१० -६५४