दोन दिवसांनंतर देशात इतिहास रचेल ‘पठाण’, ९ व्या दिवसाच्या कमाईने दाखवली आशा

बॉक्स ऑफिसवर पठाण सिनेमा दररोज नवीन इतिहास रचत आहे. पठाण सिनेमा प्रदर्शित झाल्यानंतर नवव्या दिवशी संपूर्ण देशातून सिनेमाने १५ कोटी ५० लाख रुपये कमावले आहेत. तर आतापर्यंत पठाणने भारतात ३६४ कोटी रुपये कमावेल आहेत. पठाणने हिंदीमध्ये पहिल्याच दिवशी ५५ कोटी रुपये कमावले होते. तर दुसऱ्या दिवशी सिनेमानं ६८ कोटी रुपये तर तिसऱ्या दिवशी ३८ कोटी रुपयांची घसघशीत कमाई केली होती. तर प्रदर्शित झाल्यानंतरच्या विकेंडला सिनेमानं ११० कोटी रुपयांची जबरदस्त कमाई केली होती.

या आठवड्याच्या प्रारंभी सोमवारी सिनेमानं २५ कोटी ५० लाख रुपये तर मंगळवारी २२ कोटी रुपये कमावले होते. तर सातव्या दिवशी सिनेमाच्या कमाईमध्ये काहीशी उतरण दिसून आली. परंतु नवव्या दिवशी मात्र सिनेमाने दोन आकडी संख्येत कमाई केली. त्यामुळे पठाण सिनेमा येत्या काही दिवसांमध्ये सर्व जुने विक्रम तोडत नवीन विक्रम रचेल असा अंदाज व्यक्त होत आहे.

जागतिक पातळीवरील पठाणची कमाई

ट्रेड अॅनालिस्ट रमेश बाला यांनी पठाण सिनेमाच्या नवव्या दिवशीच्या बॉक्स ऑफिस कलेक्शनचे आकडे जाहीर केले. त्यामध्ये सिनेमानं ७०० कोटी रुपयांची कमाई केली आहे. सिनेमाची ही कमाई पाहता शाहरुख खान, दीपिका पादुकोण, जॉन अब्राहम यांचा हा सिनेमा लवकरच १ हजार कोटींच्या क्लबमध्ये सहभागी होईल, यात शंका नाही.

चार वर्षानंतर शाहरुखचं जबरदस्त कमबॅक

पठाण सिनेमातून शाहरुख खानने तब्बल चार वर्षानंतर दमदार पुनरागमन केलं. शाहरुखच्या करिअरमधील हा पहिला अॅक्शनपट आहे. ५७ व्या वर्षी शाहरुखने जी काही अॅक्शन केली आहे, ते पाहून प्रेक्षक त्याच्या पुन्हा एकदा प्रेमात पडले आहेत. पठाण सिनेमात सलमान खान पाहुण्या कलाकाराच्या भूमिकेत आहे. सलमानला शाहरुखबरोबर मोठ्या पडद्यावर पाहून चाहते प्रचंड आनंदित झाले.