त्याची चिता जळत असतानाच वाईट बातमी धडकली, गावातल्याच आणखी तिघांचा अपघातात मृत्यू

बीड : माजलगाव तालुक्यातील झालेल्या भीषण अपघातात तीन जण जागीच ठार झाल्याची दुर्दैवी घटना बुधवारी रात्री घडली होती. या घटनेत एकाच गावातील तिन्ही दुचाकीस्वार जागेवरच मृत्युमुखी पडल्याने हळहळ व्यक्त केली जात होती. परंतु या गावावर फक्त तिघा जणांच्याच मृत्यूने शोककळा पसरली नव्हती, तर चार जणांच्या मृत्यूचा हादरा बसला होता.

दिंद्रुड परिसरात घडलेल्या अपघातात मयत तिघेही बीड जिल्ह्यातील माजलगाव तालुक्यातील लहाने वाडी येथील रहिवासी होते. याआधी त्याच दिवशी गावातील एका तरुणाचा मृत्यू झाला होता. रंग देताना जिन्यावरून पडल्याने याच गावातील जखमी तरुण भारत दिलीप गायकवाडचा उपचारादरम्यान मृत्यू झाला होता.

भारतचा अंत्यविधी करण्यासाठी स्मशानभूमीत पोहोचेपर्यंतच गावात दुसरी बातमी धडकली. गावातील आणखी तिघा जणांचा अपघातामध्ये मृत्यू झाल्याची घटना घडली. एकाच दिवशी अनेक कुटुंबांवर काळाने घात घातला होता. कारण या कुटुंबातील कर्ते पुरुषच मृत्युमुखी पडले होते.

लहानेवाडी येथील लक्ष्मण सुभाष कापसे (वय ३६ वर्ष), नितीन भाऊसाहेब हुलगे (वय ३० वर्ष), अण्णा बळीराम खटके (वय २७ वर्ष) या तिघांचा तेलगाव येथील जिनिंग व मजुरीचे काम करून आपल्या गावी परतत असताना सायंकाळी मृत्यू झाला.

एकाच दुचाकीवर हे तिघे निघाले होते मात्र माजलगावकडून धारूरकडे जाणाऱ्या भरधाव कारने या दुचाकीला समोरासमोर जबर धडक दिली. यातील दोघांना चारचाकीने दूरपर्यंत फरपटत नेल्याने त्यांचा जागीच मृत्यू झाला तर एकाचा उपचारादरम्यान माजलगाव येथील शासकीय ग्रामीण रुग्णालयात मृत्यू झाला या घटनेची माहिती मिळताच दिंद्रुड पोलीस घटनास्थळी दाखल झाले मात्र तोपर्यंत या अपघातातील तिघांची प्राणज्योत मालवली होती.

हेही वाचा : …तर हे माझा जीव घेतील, सुशांतचा आईला फोन ठरला अखेरचा, मृत्यूचं गूढ उलगडण्याच्या मार्गावर

ही बातमी गावात पोहोचली, तेव्हा गावात आधीच भारत गायकवाड या युवकावर अंत्यसंस्कार चालू होते. त्याच्या अंत्यविधीलाच या तीन युवकांच्या मृत्यूची बातमी पोहोचली. यामुळे लहाने वाडी या गावात एक नव्हे तर चार कुटुंबांवर काळाने मोठा घाला घातला. या चारही कुटुंबातील युवकांना लहान-लहान मुलं असल्याचं देखील गावकरी सांगत आहेत.

हेही वाचा : गर्लफ्रेण्ड दुसऱ्या पोराबरोबर दिसली, मुंबईकर तरुणाचं डोकं फिरलं, रागाच्या भरात सगळं संपवलं