आदित्य ठाकरेंच्या वरळीत शिंदे गट राजकीय स्फोटाच्या तयारीत, सचिन अहिरांना गळाला लावणार?

आदित्य ठाकरे यांच्यापूर्वी वरळी विधानसभा मतदारसंघात सुनील शिंदे यांनी विजय मिळवला होता. तर याच परिसरात सचिन अहिर यांना मानणाराही एक मोठा वर्ग आहे. २०१९ मध्ये उद्धव ठाकरे आणि शिवसेनेच्या धुरिणांनी व्यवस्थित चाचपणी करुन आदित्य ठाकरे यांना वरळी विधानसभा मतदारसंघाच्या रिंगणात उतरवले होते. त्यासाठी तत्कालीन विद्यमान आमदार सुनील शिंदे यांची समजूत काढण्यात आली होती. तर राष्ट्रवादी काँग्रेसमध्ये असलेल्या सचिन अहिर यांना शिवसेनेत आणून वरळी विधानसभा मतदारसंघ आदित्य ठाकरे यांच्यासाठी पूर्णपणे सुरक्षित करण्यात आला होता. मात्र, आता वरळीतील हेच दोन प्रभावशाली नेते शिंदे गटात गेल्यास ठाण्यातून मुख्यमंत्र्यांविरोधात निवडणूक लढण्याचे आव्हान देणाऱ्या आदित्य ठाकरे यांचे मनसुबे धुळीला मिळू शकतात. त्यामुळे आगामी काळात वरळीत शिंदे गट राजकीय स्फोट करणार का, याकडे सर्वांच्या नजरा लागल्या आहेत.

आदित्य ठाकरे नेमकं काय म्हणाले?

आदित्य ठाकरे हे सध्या नाशिकच्या दौऱ्यावर आहेत. त्यांनी मुख्यमंत्री एकनाथ शिंदे यांना आमदारकीचा राजीनामा देऊन आपल्याविरोधात वरळीतून निवडणूक लढण्याचे आव्हान दिले होते. या वक्तव्याला काही दिवस उलटल्यानंतर आदित्य ठाकरे यांनी आणखी पुढे जात एकनाथ शिंदे यांच्याविरोधात ठाण्यातून निवडणूक लढवण्याची भाषा केली होती. मुख्यमंत्री एकनाथ शिंदे माझ्या चॅलेंजला घाबरले. मी दुसरं चॅलेंज देतो, तुम्ही मुख्यमंत्री पदाचा राजीनामा द्या, मी राजीनामा देतो. मी ठाण्यात येतो. तिथे लढून दाखवतो, बघू कोण जिंकून येतंय, एकदा होऊनच जाऊ द्या, असे आदित्य ठाकरे यांनी म्हटले होते.